GeoGebrak atera du 3D bertsio egonkorra

Azken hilabeteetan beta bertsioa erabil zitekeen arren, irailean atera du GeoGebrak 3D bertsio egonkorra. Hemendik aurrera, GGB jaistearekin batera leiho berria izango da erabilgarri.

Ospatzeko, Euskal Herriko GeoGebra Institutuko partaide Asier Ruizek logoaren 3D eraikuntza diseinatu du:

http://tube.geogebra.org/student/mNb79qQ0W

GeoGebraTuben aurkituko dituzue eraikuntza gehiago, eta, bestalde, gogoratu zuek ere igo ditzakezuela zuen eraikuntzak, guztiok erabil ditzagun. Erabili basque etiketa.

GeoGebra topaketak Baezan

Datorren irailaren 10etik 12ra, GeoGebra Topaketak egingo dira Baezan (gizon-emakume guztion ondarea da Baeza, Jaenen), Andaluziako UNIAren udako ikastaroen baitan.

Ikasmaila guztietako matematika irakasleei zuzenduriko topaketak dira. Jardunaldiak 9:00etan hasiko dira eta 14:30etan amaitu, 20 orduko iraupenarekin (trebakuntzarako kreditu-sisteman onartuko dira). Parte-hartzaileek egoitza izango dute eskura.

Hasiera ekitaldian Markus Hohenwarterrek hartuko du parte, GeoGebraren sortzailea eta proiektuaren zuzendaria.

Informazio gehiago aurkituko duzue hemen (http://institutosgeogebra.es/).

 

GeoGebra Hik Hasi aldizkarian

Hik Hasiren maiatzeko zenbakian (188) GeoGebrari buruzko artikulua idatzi dute Aitzol Lasa eta Miguel R. Wilhelmi matematika irakasleek. Alde batetik, Nafarroako Unibertsitate Publikoan GeoGebra nola erabiltzen duten azaldu dute, eta, bestetik, eredu dinamikoak erabiltzeko zenbait adibide eman dituzte.

Artikuluan, adibide horien guztien GeoGebraTuberako estekak aurkituko dituzue.

Zenbakiari buruzko berria, hemen: http://www.hikhasi.com/albistea.php?id=892

Euskal Herriko GeoGebra Institutua abian da

2014ko urtarrilean lanean hasi da Euskal Herriko GeoGebra Institutua, Nazioarteko GeoGebra Insitutuaren tokiko elkartea. Udako Euskal Unibertsitatearen baitan sortu da elkartea, eta hiru helburu nagusi ditu:

  • GeoGebra softwarearen euskarazko bertsioa kudeatzea.
  • Matematikaren irakaskuntzarako materialak sortu eta partekatzea irakaskuntza etapa guztietan.
  • prestakuntza iraunkorra eta ikerketa sustatzea matematikaren didaktikan.

matematika irakaslea bazara, baliabide hauek erabiltzea libre duzu. Zuk zeuk ere igo ditzakezu zure baliabideak, besteek erabil ditzaten. Horrez gain, elkartean parte hartu nahi baduzu, UEUko matematika sailarekin harremanetan jar zaitez.