Katu-saldoa

Nafarroako Proiektuen Kudeaketarako Jakinmin Bereziko Taldea sortu da gaur, CEINen babespean. Aurkezpen ekitaldian hiru pilula banatu dizkigute:

• Thomson Reuterseko Juan Arraizak OPM3ri buruz hitz egin digu. Praktika onak eta gaitasunak zehazten ditu eredu honek, CMM-ren antzera, eta proiektuen kudeaketan proiektuaren, programaren eta proiektu-zorroaren dimentsioak aztertzen ditu. Dimentsio hauetaz gain erakunde-eragileak aipatu ditu.
• Indrako Carlos Monrealek administrazioarekin eramaten dituzten proiektuen berezitasunez jardun du. Barneko eta kanpoko proiektu kudeatzaileen arteko errol banaketaz, pertsonen garrantziaz (errotazioa gutxitu behar dela), arraskata neurtzeko aldeak (adibidez, bozketarako grina), hierarkiaren egonkortasunaz, arauez lotutako zuzendaritzaz eta horrelakoetaz mintzatu da, edozein proiektuan nagusiak diren arloak ahaztu gabe.
  
• Tracasako Mans Shapshak IT munduan sartu da, "Analista edo mamua" izenburupean. Bere hitzaldian software txarraren zioak gainbegiratu ditu, probatzeko metodologia kaskarra eta eragiketetako akatsak, kasu, eta diseinu alternatibak arakatzeko beharra defenditu du. Taldearen antolakuntzan The Software Design Studio/House proposatu du, arlo anitzeko teknikariak elkarrekin lanean jartzeko.
  

Talde bezala oso hasera polita izan dugu, ea gerora ere taxuzko gauzak egiten ditugun.

Pasa den ostiralean Modalidades de Aprendizaje Telemático y Resultados Interuniversitarios Extrapolables al EEES (MATRIX) liburua aurkeztu genuen Nafarroako Unibertsitate Publikoan eta Oviedoko Unibertsitatean. G9 unibertsitate-taldean emandako irakaskuntzaren gaineko ikerketa baten emaitza da liburu hau. NUPen partez HBGMIko zuzendaria den David Benitok, G-9 Unibertsitateetako Campus Birtualeko zuzendaria den Joaquín Sevillak eta ikerketaren koordinatzailea izan den Mikel Gómez Lasok hartu dute parte. Bideokonferentziaz Mieresetik konektatuta, aldiz, liburuaren koordinatzaileetako bat izan den Maria Esther del Moral-ek eta Teknologia Berrikuntzaren zuzendaria, Aquilino Juan Fuentek lagundu dute emanaldian. Partekatutako irakaskuntza telematikoa ez da oso gai jorratua, hortaz liburu interesgarria izan liteke. Idatziko dizuet gehiago, irakurtzen dudanean.

Zein da erakunde baten helburua? Ahaztu plan estrategikoak, ahaztu enpresaren xedea eta ikuspegia, ahaztu balioak. Erakunde baten helburua bertan dohainik lan egiteko arrazoian datza. Gaur egungo enpresetan militantzia eskatzen omen da. Haseran utopiko xamarra eman arren, kontuan hartzeko argudioa deritzot Julen Iturberenari.

Atzo Informatikari Euskaldunen Biltzarrean izan nintzen. Giro ezin hobea, aspaldiko lagunekin elkartzeko aukera, eta oso gai interesgarriak. Bileraren erritmoa ere on-ona izan zen, azkarra, baina ez axalekoa, eztabaidatzeko eta galdetzeko aukera ere bai, baina doi-doi. Donostiako Teknologi Elkartegiko Eraikin Nagusian berrehundapiko informatikari bildu ginen. Eraikina oso egokia iruditu zitzaidan, eta polita.
Lehen hitzaldia Elhuyar Fundazioko Igor Leturiak eskeini zuen. Txundituta utzi gintuen AnHitz 3Dtako pertsonaiarekin. Neskaren mugimendua, hizkuntza batetik bestera pasatzeko abilezia (ahots ezberdinez, momentuz), eta batik bat ahotsa ulertzeko erakutsi zuen adimen harrigarria zen. Ixa taldeko Kepa Sarasolak duela hamar urte hain urruti iritsiko zirenik ez zuela aurrez ikusten aitortu zidan. Egia esanda, galderen ulermenaz eta erantzunen egokieraz Igorrek eman zituen datuak, perfektuak izan gabe, oso txukunak dira.

Atzo Espainiako CSIC-ek egiten duen unibertsitate-sailkapenaz idatzi nizuen. Ildoari jarraituz, Isidro Aguillok munduko sailkapen edo ranking-ak azaldu zituen. Adierazle bakar batean unibertsitate guztien edo gehienen ezaugarriak erkatzea ez da lan makala. Bere ustez, beraien sailkapena eta beste batzuen artea korrelazioa badago. Eskerrak. Munduko web ranking honek unibertsitateen jardun gehiago neurtzen ditu, orekatuagoa da. Hau da, ikerketaz gain irakaskuntza eta hirugarren misioa ere kontuan hartzen ditu. Eta hori onuragarri bezain eztabaidagarria da.

Adierazleak jarduna eta eragina neurtzen ditu, %50na. Eragina batik bat estekak zenbatzen neurtzen dute (trafikoa ere kontuan hartuko dute laster), eta jarduna hiru ataletan banatzen dute:

• Tamainua (argitaratutako web orriak)
• Edukin aberatsak (pdf-ak)
• Zientzia edukinak (Google Scholar)

Azalpenak eta gero, aholku batzuk eman zizkigun web praktika onenak zirela eta. Bere ustez, bi domeinu erabiltzea oso kaltegarria da adierazle honetan ondo ateratzeko! Izan ere, Universitat Autònoma de Barcelonaren kasua aipatu zigun, beste adierazleetan Estatuko onena, eta honetan, domeinu bat .cat-en eta beste bat .es-en dituelako, atzera zigortuta. Puntu eus domeinua bultzatzen ari garen honetan ez da gomendio tolesgabea.Frantziako unibertsitateetan ere gertatzen dira horrelakoak, ez bi hizkuntza komunitateri erantzuten dietelako, unibertsitateen arteko campusak dituztelako baizik.

Nik ere adierazletan ibiltzeko hiru gomendio eskainiko nizkioke, gaia sakonki aztertu gabe:

• Neurtu hobeto bi edo hiru domeinuetan dauden unibertsitateak. Internazionalizazioa aurrera doan heinean herrialde bat baino gehiagotan eta hizkuntza bat baino gehiagotan ezarriko dira unibertsitateak.
• Erabaki teknikoetatik independizatu adierazlea. PDFn argitaratu ala ez, edo DNSa aldatzeak ez dute eragin handirik unibertsitatearen kalitatean.
• Egonkortu sailkapena. Ez da erraz ulertzen zergatik unibertsitateen sailkapena aldatzen den hain denbora laburrean

Aste honetan Nafarroako Unibertsitate Publikoan Isidro F. Aguillo, Cibermetriako Laborategiaren burua izan dugu hizlari. Ikerlari honen lana ezagutzeko hona eta hona jo. Bere hitzaldian "Unibertsitateen web sailkapena. Munduko ranking-a, tokiko ekintza" gaiaz jardun du. Eskertu behar diogu ausardia Alfonso Carlosena Nafarroako Unibertsitate Publikoko Ikerketa errektoreordeari, ezen eta Aguillo jaunak gidatzen duen adierazlean behin NUP Estatuko azken bigarrena sailkatu baitzen. Azken ikerlanean, ordea, gora egin du nabarmen, taularen erdiko kaskarkeriara (48/79), eta munduko mila onenetarik kanpora. NUPen web berriaren proiektua butxatuta dagoela jakinda, adierazlearen kamutsa bera ez ote dabil igoera honetan ageri galdetzen diot neure buruari. Baina eskandalagarriena tokiko ekintzaren arloan zabaldu zuen, eta horretaz bihar idatziko dizuet.

Aurreko batean aipatutako kanpainaren barruan NUPeko irakaslea den Javier Arzak hitzaldi berri bat emango du Lizarra ikastolan, martxoak 26. Javier Arzak NUPeko Gizarte Langintza Sailean egiten du lan, ongizate eta integrazioaren inguruan. Drogen menpetasuna ere landu izan du Y tú, ¿qué haces? eta Las drogas liburuetan eta El que más chanela mejor decide komikian.

Oraingo honetan Nafarroako Ikus-entzunezkoen Kontseiluarekin batera honako puntu hauek argituko ditu:

• Gure seme-alaben bizitza esparru ugari betetzen dituzte pantailek: ikasketak, aisialdia, gizarte erlazioak,...
• Internet, bideojoko, sakeleko, telebistaren presentzia: gure hezkuntza lana komunikazio teknologia berrien testuinguruan.
• Bere arrisku eta abantailak identifikatu.
• Bere arriskuen aurrean gure seme-alabak nola babestu.
• Pantailen erabilera zuzenean laguntzeko jarraibideak.

Bi berri labur dakartzat software librearen inguruan:

• Gaur, arratsaldeko 19:30tan, NUPeko Arrosadiako Campuseko Haginak eraikineko ekitaldi aretoan, GNUPNA taldea bilduko da, zeinen asmoa NUPen software librea bultzatzea baita.
• Bihar NUPen "Iturburu irekiko sofwarerako sarrera" ikastarotxoa emango dut, antzeko helburuarekin.

Otsailaren 9an Aitzpea Leizaola antropologo ezaguna inauterien esanahiaz aritu zitzaigun, Nafar Ateneoak eta Ahari Kultur Elkarteak antolatutako hitzaldi batean. EHUko irakasleak inauteriak fenomeno europarra dela esan zigun, eta Antzin Aroan kokatu zuen beraien jatorria. Demaseko ospakizun horretan denboraren kudeaketaz aritu zitzaigun, ilargiaren zikloaz eta 40 eguneko zikloaz. Bere ustez, sensu stricto 5 eguneko jaialdiaz gain, zentzu laxoan Gabon Zaharretako mozorroetatik, Zuberoako maskaradak eta Donostiako Sansebastianak barne, Luzaideko bolantetaraino heda daitezke, Piztuera iganderaino, alegia.

Antzin Aroko jatorriaren aurka Julio Caro Baroja maisua eta bere 1965ko lana El carnaval aipatu zigun. J. Caro Barojak jatorri kristaua azpimarratu zuen. Idazle honek inauteriak hil dira aldarrikatu zuen. Bere ustearen kontra, inoiz baino biziago daude. Europa guztian erritoen hala-nolako berpizkundea jazo dela kontatu zigun Aitzpeak, kohesiorako elementu baten legez jokatuz.

Beste ikerlari baten lana ere goratu zigun, Thierre Truffaut-en Le Carnaval Labourdin. Hona hemen, Don et contre dans les tournées carnavalesques du Labourd.

Inauteriek gaur egun duten esanahiaz, eta gure gizartean betetzen duten funtzioaz jardun zuen gero. Barne turismo puntuala, eta pertsonaia berriak (Aldabika, Palokiak) aipatu zizkigun. Herrietan behar diren anonimotasunaren mozorroak, eta hirietako erakustaldiak inauterien sailkatze bat erakusten digute, landa eremua eta hiria banatuta. Inauteriaren barnean gorrien eta beltzen paperak, ordenaren eta kaosaren ordezkariak direla gogoratu zigun.

Inauterien aspaldiko funtzioetan bi nabarmendu zizkigun:

• Naturaren gaineko kontrola, adibidez zaldikoen zikiratzean edo hartza lotuta eramatean islatuta
• Ez-ohiko jana eta edana, adibidez barrikadetan, elkartetan eta inongo puska biltzean

Hitzaldian hainbat pertsonaia eta mozorro aipatu, eta diapositibetan erakutsi ere egin zigun. Bukatzeko, inauteriak denboran nola hedatu diren, partaideengan ere bai. Duela ez asko gizonezko ezkongabeen festa zena, orain guztiona dela, nahiz eta herri batean edo bestean, Goizueta kasu, neskak onartu ez. Baina festa bizi-bizirik dago, eta elementu berriak ekartzen eta gehitzen ditu, motozerra mendian, edo Donostian etorkin Peruarren karroza, adibidez.

Esteka pare bat gehituko dut bukatzeko:

• Euskal Inauteriak
• Inauteriak Euskal Herrian

Ricardo Feliú Martínez-en ustez, 90 lagunek osatzen dute foru botere-elitea. Nafarroako Unibertsitate Publikoko irakasle honek irakurri duen La distribución social del poder: la élite navarra en el cambio de siglo (1999-2004) tesiaren arabera, jauntxo hauek antzeko jatorriak dituzte, eta klase berekoak dira. Ideologikoki UPNkoak, eta katoliko praktikatzaileak dira. Talde txiki hau aginte postu guztietan dago, Nafarroako Gobernuan, Nafarroako Kutxan, Nafarroako Enpresaburuen Konfederazioan, Nafarroako Merkataritza eta Industria Ganberan, unibertsitateetan eta Gobernuaren sindikatu kuttunetan, hots, UGTn zein CCOOen. Enpresa zein fundazio publikoei ere halako ustelkeria usaina dario, gutxi batzuk aholku postu guztietan baitaude.