Nondik datorren datu-basearen izena

Egia esan, ez dut zehatz-mehatz
gogoratzen noiz, nork eta nola asmatu genuen UEUren euskal produkzio zientifiko-unibertsitarioaren datu basea Inguma izenarekin
bataiatzea. Baina badut oroimen lauso bat. Horra.

Bilera batean izen zen, duela hamabost
bat urte: datu-basearen proiektua aski garbi marraztua agertzen hasi
zen gure elkarrizketan baina, une batean, Barandiaranek jasotako
esaldi ospetsu hura etorri zitzaigun gogora eta hizpidera, badakizue,
izena duen guztia omen da
.
Beraz, izen bat behar genion
ezarri proiektu berriari, izaten has zedin.

Garai haietan
tipikoa izaten zen proiektu handiak izen mitologikoekin
bataiatzea, apur bat NASAk eta enparauek unibertsoaren
esploraziorako jarritako modari segituz: Mercury, Apollo, Ulysses…
Baina jakina, geuk euskal mitologia erabiliko genuen horretarako.
Oker ez banago, bazen bilera gelan Barandiaranen libururen bat, paperezkoa (garai hartan ez genuen internet ezagutzen oraingoz) eta,hantxe, bilaketa ez oso luze eta ez oso korapilatsu baten ondoren,aurkitu genuen euskal izen mitologiko egokia: Inguma. Kontuari zeremonia gehiegi dedikatu gabe, bilerarekin segitu genuen. Bagenuen izena, baginen

Bilera haren atzean beste asko etorri
ziren, asko, ugari. Akigarriak. Ez zegoen dirurik, xentimorik ere ez zegoen, gure lana eta ilusioa baino ez zegoen. Ez da lekurik aproposena aitortzeko nola eskuratu genuen egitasmoan
erabili zen lehen ordenagailua (ez, hobe ez oroitzea), ezta ere orduko lanak eta burukominak… kontua da, hori bai gogoratzen dut,uneren batean izenaren gaineko zalantzak ere agertu zirela. Izan ere, Barandiaranena ondo arakatuz deskubritu genuen Inguma, berez,
jeinu gaizto bat zela, gauaz, lo zauden bitartean, zure gelara datorrena zuri eztarria estutzera arnasa kendu arte… Alegia, Inguma
amets gaizto bat da, amesgaiztoaren pertsonifikazio mitologikoa. Ez ote zen izen hori izango gure amesgaiztozko ibileraren eragilea? Izena aldatuz lortuko ote genuen izana hobetzea?

Sinpletasunak salbatu gintuen, batzuetan falta izaten zaigun xalotasunak. Aski izan zen hiztegi arruntu batera begiratzea konturatzeko, Barandiaranenaz gain,
inguma-k beste adiera bat ere bazuela euskaraz,
egunerokotasunean ongi sustraitua: inguma tximeleta bat da,
pinpilinpauxa, mitxirrika… Gure egitasmoa ez zen amesgaizto bat, aitzitik, tximeleta zoragarria bihurtzeko puntuan zegoen izakitxo fin eta aldakorra zen, oraindik bere kuskuan gordea. Izenari eustea erabaki genuen.

Eta, bada, halaxe gertatu zen. Aurki,euskal mitologiaren indar telurikoari esker, edo batek daki zergatik,
gauzak aldatzen hasi ziren eta finantziazioa iristen hasi zen. Halaxe sortu zen Inguma, izena eta izana.

Eta hala zan eta ez bazan, sartu dadila kalabazan.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude