Ikasleekin basoa ikertzeko behar dituzun joko eta trikimailu guztiak ikasteko ikastaro aproposa:
Basoak ez du ezer ezkutatzen, nahiz eta guri sekretuak dituela iruditu. Begiratzen ikasi behar da, besterik ez.
Basoak hortxe du guztia, gure begien aurrean. Oraina eta iragana ikusten zaizkio; etorkizuna igarri ahal zaio. Gizakiak basoa nola ustiatu zuen erakusten digu; norekin –animalia, landare, onddo- bizi den esaten digu; klimak, kutsadurak, ustiaketak eta abarrek nola eragiten dioten salatzen digu; dagoen tokia zergatik aukeratu duen xuxurlatzen digu; alegia, sekretuak airean dituen inguru gozagarriak dira basoak.
Ikastaroan begiratzen ikasiko dugu, modu hotz batez –neurketak eginez, adibidez- zein modu epelago batez, subjektibotasuna erabiliz. Ekosistemak, jasangarritasuna, metodo zientifikoa eta horrelako hitz potoloak modu jostagarrian ikusiko eta ikasiko ditugu, talde lana bultzatuko duten dinamikak erabilita.
Ikastaro praktikoa izango da. 6 aurrez aurreko saio izango ditu, eta horietatik 2, mendi irteerak izango dira.
Datu praktikoak:
Izena emateko:
- Garatu 12/13
- Epea: maiatzaren 7tik 17ra
Ikastaroa:
- Datak: irailak 18, 20, 22 eta urriak 2, 4, 6
- Tokia: Eibar, Markeskoa jauregia