Galdera
Kaixo, Pedagogia ikasiz gero non egin dezakezu lana eta zertan?
Kaixo Olatz,
Zure galderari erantzuteko informazioa bi ataletan banatuko dugu. Lehenengo atalean pedagogia ikasketen lan esparrua azalduko dugu, eta bigarren atalean berriz, pedagogia ikasketak eta gaur egungo lan-merkatuaren egoera.
Pedagogia lizentziaturaren lan esparrua
Pedagogia zientzia bat da eta hezkuntzaz arduratzen da testuinguru guztietan (eskolan, familian, lantokian eta gizartean) eta bizitza guztian zehar (haurtzaroan, nerabezaroan, helduaroan eta zahartzaroan).
Bere helburua da pertsonak, komunitatea eta gizartea ahalik eta gehien gara daitezen laguntzea, hezkuntza sistemaren bitartez, programa eta material pedagogikoak sortuz, erakunde eta enpresetan prestakuntza eskainiz eta gizartean esku hartzeko proiektuak sortuz eta garatuz.
Pedagogoak hezkuntza formalean (eskola) eta ez-formalean (gizartea, familia, enpresa,...) lan egin dezake. Hau da, hezkuntzan eta hezkuntza ikerketan, giza baliabideen antolakuntza eta kudeaketan, zentroen zuzendaritza eta kudeaketan, orientatzaile bezala (eskolan, famili alorrean, lan munduan eta abar.), argitaletxeetan aholkulari tekniko bezala (materialak sortzen, materialen ildo pedagogikoak aholkatzen), eta abar.
Unibertsitateek lerro kurrikular desberdinak eskaintzen dituzte eta ikasle bakoitza gehien gustatzen zaion alorrean formatu daiteke. Eskaintzen diren lerro kurrikular batzuk ondorengoak dira: Gizarte Pedagogia; Eskola Guneen Antolakuntza eta Gestioa; Hizkuntzaren Pedagogia; Hezkuntza Ikerkuntza eta Ebaluazioa; Berrikuntza, Prestakuntza eta Hezkuntzaren Kudeaketa; eta abar).
Pedagogia ikasketak eta gaur egungo lan-merkatuaren egoera.
Aurreko lerroetan aipatu dugun bezala, pedagogoen lan esparrua oso zabala da, baina kontutan izan behar da, esparru horietan psikologo eta psikopedagogoek lan egiten dutela baita. Beraz, profesional ezberdinen arteko lehia sortzen da lanpostuak eskuratzerakoan. Pedagogoen lan-merkatua aztertzeko bi bide hauek aztertzea gomendatzen dizugu:
- Euskal Enplegu Zerbitzua: Lan-merkatuari buruz informazioa jasotzeko aztertu ezazu www.lanbide.net web gunea edo hurbildu zaitez orientazio-zerbitzuko entitate laguntzaileetara:
- Web gunea: http://www.lanbide.net/
- Orientazio-Zerbitzuko entitate laguntzaileak: http://www.lanbide.net/plsql/or_CentrosColaboradores?idioma=E
- Pedagogoen Elkargoa: Euskal Herrian oraindik ez da sortu Pedagogoen elkargoa, baina bai ordea Katalunian eta Balear Irletan. Beraietako batekin harremanetan jartzen bazara, pedagogoen lan-merkatuari buruzko informazio esanguratsua emango dizute.
- Kataluniako Pedagogoen elkargoa: http://www.pedagogs.cat/index.asp?i=es&c=38
- Balear Irletako Pedagogoen elkargoa: http://www.ib-pedagogia.org/pages/inici/benvinguda.php?estoyen=inici
- Espainiako Pedagogoen Elkargoa (sortzen ari da): http://www.icolegiodepedagogos.org/
Animo! Ikasketak aukeratzea ez da erraza!