IEB2013. Izen ematea irekita.

UEUren Informatika Sailak antolatutako Informatikari Euskaldunen IX. Bilkuran, hau da,  IEB2013: Telefonoak eta Informatika jardunaldian, izena emateko epea ireki da.

IEB2013 bannerra

Jardunaldia 2013ko maiatzaren 8an, asteazkena, Donostian, Miramongo Teknologi Elkartegian egingo da.

Ikusi egitaraua eta eman izena, UEUren web gunetik: IEB2013: Telefonoak eta Informatika.

Izen ematea:

  • Izen ematea UEUren web gunetik eta Enpresa Digitalaren web gunetik egin daiteke.
  • Izen ematea maiatzaren 6a arte irekita dago.
  • Plaza mugatuak daude.
  • Doanekoa da.

Elkarrekin bazkaltzeko aukera dago, baina plaza gutxi daudenez, ahalik azkarren erreserbatzea komeni da. Bazkarian izena emateko, jarraitu web guneko argibideak.

Eskuratu jardunaldiaren IEB2013 eskuorria eta zabaldu nahi adina.

Informazio gehiago:

Ainhoa Latatu

a.latatu@ueu.org

943 82 14 26

 

 

IEB13: Telefonoak eta informatika. Komunikazioetarako deialdia.

IEB -Informatikari Euskaldunen Bilkura- jardunaldiaren 9. edizioa prestatzen hasi gara. Oraingoan, bilkuraren gai nagusitzat telefonia hartu dugu. Telefonoek Internetekin eta informatikarekin hartu duten olatua hartu nahian, sakelako telefonoen erabilera askotarikoa, smartphone-etarako aplikazioen programazioa, IP telefonia, mezularitza, geolokalizazioa, eskura dauden tresnak eta sistema eragileak, web-zerbitzuen erabilera, euskaraz dauden aplikazioak, eta abar landu nahi ditugu aurtengo bilkura honetan.

Ohi bezala, arlo horretan izandako esperientzien eta garatutako softwarearen berri ematea litzateke gure asmoa eta horretarako komunikazioak bidaltzeko deialdia ireki dugu.

Informazio gehiago:

Ainhoa Latatu

943 82 14 26

a.latatu@ueu.org

 

 

 

IEB11ren ajeak

Iritsi zen maiatzaren 12a, IEBren (Informatikari Euskaldunen Bilkura) VIII. edizioa. Goizeko 9tan eman zion sarrera UEUko zuzendaria den Karmele Artetxek bilkurari, Miramonen kokatuta dagoen Donostiako Teknologi Elkartegiko Eraikin Nagusian. Goizetik giro paregabea sumatzen zen Areto Nagusiko atmosferan. Euskal sarea ezagutu eta zabaltzeko asmoz 220 bat lagun bildu ginen; informatikariak gehienak, komunikatzaile, hezitzaile eta gaian interesatuek ere lekua izan zuten.

gizarte sareak

Edizio honetako gaia gizartean puri-purian dagoen gaia izan zen; gizarte-sareak, alegia. Aurreko edizioetan jorratutako gaiek informatikako esparru bakarra tratatzen zuten, baina sare sozialen gai honek (gizartean hain eskuragarri eta erabilgarri denak) hainbat esparru ezberdin ikertzeko aukera eman zuen. Hemen ekitaldiaren arrakasta!

Horrenbestez, hasierako 4 hitzaldi orokorretan gizarte sare hauek sortzen duten panorama aztertu zen. Ondoren, hiru gai edo esparrutan banatu zen ekitaldia. Esparru bakoitzak sare sozialen barneko azpiatal batzuk aztertu zituen; hala nola, partaide bakoitzak interesaren arabera gela batetik bestera igaro zezakeen.
Lehenengo esparruan online sare sozialetan pertsona edo marka batek duen eragina aztertu zen. Guztira 6 hitzaldi eskaini ziren.
Bigarren esparrua, hezkuntzari lotua egon zen. Hainbat proiekturen berri eman zen, guztiak IKT eta hezkuntzarekin elkarlotuak.
Azkenengo esparrua guztietan teknikoena izan zen. Bertan, oraingo teknologia berrietako gailu eta sistemen inguruan mintzatu ziren.

Goizeko ekitaldia arrakastatsua izan zen benetan. 200 lagunetik gora elkartu ginen Donostian, baina streaming bidez ere ikus-entzuleek jarraipen ona egin zuten. Ordenagailuek kea botatzen zuten eta sare sozialetako mugimendua edonor aztoratzeko modukoa zen!

Arratsaldeko saiorako eginkizun berezia zegoen prestatuta, beste urteetan egin ez zena; “sarea josten” ekitaldia, non 80 bat pertsona bildu ziren. Ekintza hau guztietatik praktikoena izan zen. Arratsaldeko saio honetara geratutako partaideak taldeka jarri eta gai baten inguruan euren ideia, zalantza, eta iritziak plazaratu zituzten. Askotariko gaiak landu ziren, hala nola; wikilariak, software garapena, ikerketa, informatika eta irakaskuntza, saregileak, software librea eta lan-kontaktuak.

Egun mamitsu eta emankorra izan zen atzokoa. Hainbat ideia, ondorio, eztabaida, etorkizuneko galderak, … ezagutarazi ziren. Partaideek ere, nola ez, elkarreraginkortasuna eta euren arteko sarea estutzea ahalbidetu zuten. Guztiok euskal komunitatea ezagutu, zabaldu eta hobetzeko esperantzarekin hemendik bi urtetara elkartuko gara. Guztion artean euskal blogosfera eta komunitatea saretuko dugu!

IEB11ren jarraipena twitter bidez

UEUko Informatika Sailak 2 urtetik behin antolatzen duen Informatikari Euskaldunen Bilkura da IEB. Edizio honetako gai nagusia gizarte sareak dira, eta zer egokiago egun osoko hitzaldi eta solasaldien berri twitter bidez ematea baino! Gure helburua, entzule gisa joan ezin dutenei bertan gertatzen dena kontatzea izango da. Horretarako, hainbat bide jorratuko ditugu.

gizarte sareak

IEB bihar, maiatzak 12an, Donostiako Teknologi Elkartegiko Eraikin Nagusian (Miramon) ospatuko den bilkura dugu. Goizeko 9:00etan zabalduko ditu ateak jardunaldien aurkezpenarekin. Sarrera hau UEUko zuzendaria den Karmele Artetxek egingo du.
9:15ean hitzaldi saioei emango zaie hasiera. Atsedenaldira arte, hau da, 11:15ak arte lau hitzaldi egongo dira. Bertan aditzera eramaten diren ideiarik interesgarrienak, gertaerak, anekdotak, … ueu_orokorra twitterraren bidez zabalduko ditugu.

Atsedenaldiaren ostean, 11:45etan, “Komunikazioak” deritzon 3 saio paralelo egongo dira. Ondorioz, ADI twitter zaleak! Izan ere, hiru twitter kontu ezberdinen bidez zabalduko ditugu mezuak! Horrela, lehenengo saioko kontaketa Ingumakeriak twitterrak egingo du. Bigarren saioko jarraipena aldiz ueu_orokorra kontutik egingo da. Eta azkenik, hirugarrengoan, kolaboratzaile baten laguntza izango dugu; Joseba Martos informatikariarena alegia. Azken saio honetan hizlari moduan ere egongo da guifi.net plataformaz hitz eginez, baina entzule gisa dagoenean bere twitter kontuarekin saio horretan gertatzen dena kontatuko du. Jarraipena egiteko hau da bere twitter kontua: http://twitter.com/#!/josebamartos

Saio paralelo hauek 13:45etan amaitzen dira. Ondoren bazkaria dator eta 15:45etan “sarea josten” ekitaldia egongo da. Arratsaldeko 17:30etan amaiera emango zaio bilkurari eta hemendik bi urtera arte agur esango dugu. Hitzaldi eta hizlarien inguruko informazio zehatza nahi baduzue IEBko blogean begiratu!

Amaia Markuleta: “Community managerraren lana eguneroko lan bat da eta ordutegirik gabekoa”

Etzi izango da UEUko informatika sailak 2 urtetik behin antolatzen duen IEBko ekitaldia Donostian. Azken asteetan bertan izango diren hizlari batzuei elkarrizketak egiten ibili gara. Oraingo honetan Amaia Markuletaren txanda heldu da. Contimarku enpresaren egiten du lan eta bere hitzaldia community managerraren profilaren inguruan izango da. Hau da kontatu diguna.

AMAIA MARKULETA

1)Community manager, modako hitza da. Baina nola definituko zenuke zuk? Zer eginkizun zehazki du pertsona honek?

Community Managerra marka edo kausa baten inguruko komunitatearekin gizarte sareetan lan egiten duen komunikatzailea da.  Atetik kanpo erakundearen ahotsa da; bere publiko objetiboa bilatu, erakarri eta markaren mezua eramaten du. Eta atetik barrura, bezeroaren beharrak enpresari igortzen dizkio.  Bien artean harremanak hazi, mantendu eta mugitu behar ditu biek etekina atera dezaten.

 

2)Zein gaitasun izan behar ditu pertsona honek?

Garrantzitsuena komunikazioko ezaguerak izatea da.  Marka baten ordezkaria da gizarte sareetan eta egunero lan egin behar du enpresaren mezuarekin.  Komunikazioa ez da edozeinek lantzen dakien “produktua”.  Eta oraindik zailagoa gertatzen da krisialdi bati aurre egin behar zaionean.

Bestalde, oso ondo ezagutu behar du Internet eta honek eragin dituen komunikazioko prozesuen aldaketak.  Jendearen harremanak informazioarekin asko aldatu dira 2.0-ko munduan eta hauekin ohituta egon behar da gizarte sareen erabilera eraginkorrena egiteko. 

Gainera, oso mundu teknologikoa da hau, beraz tresna eta aplikazio berriekin  esperimentatzea gustokoa izan behar du, ahalik eta partidu gehiena ateratzeko.

3)Beharrezko pertsona da erakunde edo enpresentzat? Edozein enpresek izan beharko luketen pertsona da; nahiz txiki edo handi izan?

Entzuteko besterik ez bada ere, gizarte sareetan edozein enpresak egon beharko luke han baitaude bere bezeroak.  Eta entzute hau zehatza eta eraginkorra izan dadin profesional bat kontratatu behar du.  Agerikoa da enpresa handiak komunitate eta jende masa handiak mugitzen dituztela eta beraientzako beharrezkoa da erabiltzaile guzti hauek elkartu eta dinamizatzea.  Baina askotan, enpresa txikientzako oraindik garrantzitsuagoa gertatu liteke, hedabide tradizionaletan lortu ezin dezaketen ikuspegia beste alde batetik eskuratzeko.  Azkenik, beren komunikazioko kanala izateko aukera dute eta bezeroen beharrak ezagutzea oso abantaila konpetitiboa da edozeinentzat.

4)Enpresa barneko norbaitek burutu behar duen lana da edo kanpoko batek?

Ez da beharrezkoa, baina enpresarekin erlazio oso estua ezinbestekoa da lana ondo burutzeko.  Alde batetik oso garrantzitsua da markaren filosofia eta mezua ondo ezagutzea, bere komunikazioko estrategia oso garbi izan behar baitugu edozein egoeraren aurrean erreakzionatzeko.  Erakundeak markatu behar du bidea eta denbora bakoitzeko beharrak.  Horregatik, nahiz eta kanpoko pertsona bat izan, barnekoa balitz bezala lan egin behar du eta hori bilerekin eta elkarrekin bizitzen lortzen da.  Niri astero gustatzen zait nire bezeroekin biltzea; asteko helburuak markatzeko eta komunitatearen igarotzea komentatzeko.  Zenbat eta gehiago bezeroa ezagutu,  gehiago jakingo duzu nola bere komunitatea aurkitu, harrapatu eta asetu.

5)Intuizioa beharrezko faktorea da edo ikasi egiten da community manager ona izaten?

Nik uste gauza asko ikasi daitezkeela, bai.  Komunikazioa, teknologia… ikasi daitezkeen ezaguerak dira.  Baina, lanbide guztietan bezala, badaude pertsonalitatearen bereizgarri batzuk zure lana hobeto egiten lagunduko zaituztenak.  Adibidez, trebetasun sozialak izan behar dituzu: hizlari ona izan, enpatikoa, ulerkorra, taldean ondo lan egiteko gai…

6)Dedikazio osoa izan behar du lan honi community managerrak? Edo beste lan batzuk egin ditzake?

Komunitate bakoitzak behar ezberdinak ditu eta zure helburuen arabera doa dedikazioa.  Baina ondo eramateko denbora eman behar diozula nabaria da.  Eguneroko lan bat da eta ordutegirik gabekoa, komunitatea edozein egunean edo orduan elkar eragin baitezake eta beti “online” egon behar zara.  Iphone bezalako mugikorrak asko laguntzen dute baina, egia esan, azkenean, lanera asko lotzen zaituzte, edozein momentuan edozein lekuan agertzen baitzaizu lana.

8gnlurld…geurea da!

UEUko Informatika Sailak antolatzen duen IEB2011ko hitzaldietako bat da Josi Sierra Orrantia irakasle eta komunikatzaileak emango duena; zortzigarren lurraldea…geurea da! lelopean, zortzigarren mundua, hau da, euskararen erabilpena eta etorkizuna sarean, azalduko du. Horretarako bideo serie bat osatu du euskal gizartean ezagun diren 7 adituekin.

gizarte sareak

7 aditu eta 7 gai; hau izango da bideoaren muina. Komunikazioa, Linux, Blogak, Web 2.0, Wikiak, Kultura eta Komunikabideak izango dira jorratuko diren gaiak.

Komunikazioaren gaia Gorka Juliorekin aztertuko da. Informatikari andoaindarrak “komunikazioa” kontzeptuaren esanahia azalduko digu; horretarako Jose Inazio Basterretxea, EHUko irakasleak, hitz honi eginiko definizioa hartuko da ardatz.

Linux eta software libreaz mintzatzeko, Luistxo Fernandezena jo du Josi Sierrak. CodeSyntax-eko project managerrak Linux zer den eta software librearen ideia eta errealitatea aztertuko ditu.

Blogen inguruan hitz egiteko Joxe Aranzabal Mondragon Unibertsitateko irakaslearekin jarriko da kontaktuan. Blog bat zer den eta nola ustiatzen den ezagutuko dugu.

Iratxe Esnaola informatikaria izango da bideoan agertzen den hurrengo aditua. Web 2.0 delakoaz hausnartuko du; sortu dituen aldaketak erabiltzaileengan eta batez ere euskal komunikatean.

Maite Goñi irakaslea izango da hurrengo gonbidatua. Wikiez hitz egingo du eta baita elkarlanean aritzeaz suposatzen duen erronkaren inguruan.

Seigarren aditua ere emakumezkoa dugu. Kasu honetan, Alaia Martin bertsolari oiartzuarra. Kulturaren inguruan eta sortzeko modu berriez solastuko da. Kultura eta elkarlana uztartuko ditu sarean.

Bideoko azken gonbidatua Lontzo Sainz EITBko networkinga izango da. Atzera begirada egingo du komunikabideen ibilbidean. Horrela, lehenengo pertsonan kontatuko du komunikabideek izan dituzten aldaketak.

Baina zer da edo zein da 8gnlurld?   Euskararen erabilpena eta etorkizuna sarean.ZU ZARA, GU GARA. Denon eskuetan dago zortzigarren lurraldea sortzea eta zabaltzea. Beraz, erabil ezazu euskara eta tresna libreak euskara zabaltzeko!

Iñaki Lakarra: “Offline edo online ospea? Sektorearen arabera bata bestea baino garrantzitsuagoa izango da”

Iñaki Lakarra Mondragon Unibertsitateko irakaslea da 1988.urtetik Informatika eta Telekomunikazio alorrean. UEUko Informatika Sailak antolatzen duen IEB2011ko hizlarietako bat izango da. Online ospeaz hitz egingo du maiatzaren 12an Miramonen ospatuko den ekitaldian.

iñaki lakarra

1)Zer da online ospea?

Pertsona, marka edo enpresa baten ospea Internet-en. Enpresa, erakunde edo pertsona batek bere “marka” diseinatu dezakeela esan dezakegu, baina bere ospea gainontzeko pertsonen menpean egongo da. Turismo arloan adibidez estatistiken arabera sektoreak berak Internet-en dagoen informazioaren %20 bakarrik garatzen du, gainontzeko %80 kanpoko pertsonek garatzen dute.

2)Zein irizpide hartzen dira kontuan ospea neurtzeko?

Alde batetik zer neurtu nahi dugun finkatu behar da
: pertsona baten izena, enpresa baten zerbitzu edo produktuak… hau da; bere marka desberdinak. Ondoren begiztatze prozesua zabaldu behar dugu, bertan bilatzaileen emaitzak, sare sozialak, foroak, blogak eta abar kontutan hartuko ditugu. Jasotzen ditugun iruzkinak bere kalitate (onak, txarrak edo neutroak) eta bere eraginkortasunaren (preskribatzaile, erabiltzailea edo trolla) arabera sailkatu behar ditugu.

3)Enpresa edo erakundeek parte hartu behar dute ospe horretan? Edo kanpoko agenteek ahalbidetzen dute soilik ospe hori ona edo txarra izaten?

Enpresa eta erakundeek ospe hori ondo kudeatzen jakitea ezinbestekoa da. Kudeaketa hau gure marka zein motatakoa den aztertuaz hasten da: gurea “marka garbia” al da? hau da; gure izena guk bakarrik erabiltzen al dugu. Bestalde gure izen berberarekin enpresa, erakunde edo produktu desberdin daudenean “marka zikina” dela diogu. Mondragon hitzaz, adibidez, unibertsitatea, herria edo kooperatiben taldea aurkitu ditzakegu interneten.

Bilatzaile ezberdinetan eta sare sozialetan lortzen ditugun emaitza nagusiak (testu emaitzak, berriak, irudiak, bideoak, etb.) gure kontrolpean daudenean ospea kudeatzea askoz errazagoa izango da. Hala ere, egoera hau, gure kontrolpeko edukiak lehen posizioetan agertzetzea, babesteko neurriak hartu beharko ditugu.

Lortzen diren emaitzak gure kontroletik at daudenean berriz, egin beharreko lana handiagoa da. Horrela, SEO (Search Enginee Optimization) tekniken bitartez, eduki hauek guk sortutakoen atzetik agerraraztea lor dezakegu. Dena den ospearen krisi baten aurrean gaudenean akzio plan konplexuago bat burutu beharko dugu.

4)Offline eta online ospea. Orain arte lehendabizikoa hartzen zen kontuan bakarrik. Egun, onlinek du protagonismo osoa?

Gauzak ez dira zuriak edo beltzak. Sektorearen arabera, bata bestea baino garrantzitsuagoa izango da. Industria batzuentzat egunkarietan agertzen diren berriak askoz garrantzitsuagoak izaten dira. 

Berriek izan dezaketen eragina enpresaren araberakoa ere bada. Orain dela hilabete batzuk adibidez, Zara-k bere online denda iragarri zuen lehenengoz. Hasiera batetan webguneak akats asko zituen eta kasu honek sarean zarata asko sortu zuen. Denbora pasa ahala, Zara-k buelta eman dio egoerari eta online dendak salmenta kopuru oso ona dauka. Hori bai, webgune hau sortu zuen agentziaren ospea nahiko ukituta geratuko zen.

5)Miguel del Fresno:”SEOk ez du errekonozimendua neurtzen,marka edo enpresaren posizionamendua bakarrik”. Horrekin ez omen da nahikoa. Ados al zaude?

Guztiz ados.  Posizionamenduak ez du errekonozimendua neurtzen, gure markak lortzen duen posizionamenduaren emaitzak ikertu, aztertu eta sailkatu behar ditugu benetan gure ospea zein den ikusteko. Ospe hori hobetzeko dugun tresnetako bat posizionamenduan eragina izango duten akzioak burutzea izango da.

6)Zein aholku eman ditzazkezu enpresa edo erakundeei? Community managerraren profila beharrezkoa da adibidez?

Lehen komentatu duguna laburbilduz, lau puntuko prozesuaz arituko gara:
– Markak zehaztu.
– Erabili behar ditugun tresnak konfiguratu.
– Eraginkortasunaren analisia egin.
– Akzio plana diseinatu eta burutu.

Guzti hau online ospearen kudeaketa aurrera eramaten lagunduko digun arau zerrenda edo dokumentu batetan islatuko dugu.

Community managerren profila baino gehiago, community managerren rola da beharrezkoa. Hau da, komunikazio, informatika edo marketing arloetako pertsona batek eraman beharreko lana da. Nire iritziz, lan hau enpresa barruko langile batek egin behar du derrigorrez, ezin da kanpoko baten esku utzi. Behar beharrezkoa da gure enpresaren  negozioa, estiloa, misioa, irizpideak, etb. ondo ezagutzea. Enpresaren arabera, batzutan lan hau langilearen beste eginkizun batzuen tartean egongo da, beste batzuetan berriz dedikazio osoa beharko du.

Joseba Martos: “Guifi.net fundazioa internet moduko azpiegitura bat da”

1996az geroztik, bi urtetik behin UEUko Informatika Sailak antolatzen duen ekitaldia dugu Informatikari Euskaldunen Bilkura (IEB). Aurtengoa maiatzaren 12an izango da Donostiako Teknologi Elkartegiko Eraikin Nagusian (Miramon). Gai nagusitzat gizarte sareak hartu dira baina egun osoz irauten duen jardunaldi honetan, hainbat hizlarik hartuko dute parte bakoitzak gai eta ideia ezberdinak azalduz. Horietako bat Joseba Martos informatikari bermeotarra dugu. 25 urteko gazteak guifi.net fundazioarentzat lan egiten du eta bere hitzaldiaren aurrerapen txiki bat kontatu digu.

joseba_martos
“Guifi.net fundazioa internet moduko azpiegitura bat da”.
Orain urte batzuk, wifiaren inguruan zalaparta handia sortu zen eta Martosek kontatu bezala, “batez ere Bilbo inguruan sekulako arrakasta lortu zuen”. Ondorioz, fudnazio hau sortu zen eta pixkanaka Bartzelonatik hasi eta Espainiako hainbat lurraldeetan barneratu zen; gurean ere lekua egitea lortu dute.

Guifi.net irekia, askea eta neutrala den telekomunikazio sarea da. Maiatzaren 12ko ekitaldian Martos fundazio honen ezaugarriez mintzatuko da; zer nolako sarea den, zer egin daitekeen, zer ezberdintasun dauden sare honen eta interneten artean, … Primizia gisa, guifi.net-eko parte hartzaileen betebeharrak kontatu ditu. Izan ere, fundazioko partaideek kontratu moduko bat sinatzen dute non konprometitzen diren sarea mantentzea eta beste erabiltzaileei libreki konektatzen uztea.

Lehen aipatu bezala, aurtengo IEBko gaia gizarte sareak dira eta Martosen bere iritzia eman du plataforma hauen inguruan; “garrantzitsua da sare sozialetan egotea, batez ere nire lanbidean. Arazoa da erabiltzaile askok ez dakitela nola kudeatu. Hau da, nola erabili, nolako segurtasun neurriak hartu, … Horregatik garrantzitsua da sare sozialen ezagupena egitea gizarteak beharrezko konnotazio positibo eta negatiboak ezagutu ditzan”.