Clotilde Caro: “Gatazkak seinalatzen duena begiratzera ausartzen bagara, gure bizitza aldatzen da arinagoa bihurtuz”

UEUren udaberriko eskaintzaren barruanGatazken ebazpena pedagogia sistemikotik abiatuta” ikastaroa antolatu dugu Iruñean. Clotilde Caro Herrera izango da irakaslea eta hainbat galdera egin dizkiogu. Matrikula zabalik dago.

Zein da ikastaroaren helburua? Ikastaroan gatazka zer den, zer mezu ematen digun eta nola konpontzen ahal den aztertuko dugu. Gatazkak beti ezkutuan dugun alde bat seinalatzen, nabarmentzen du, normalean onartzea asko kostatzen zaiguna. Gatazkak seinalatzen duena begiratzera ausartzen bagara, gure bizitza aldatzen da arinagoa bihurtuz. Hau ulertzeko, Carl Jung psikiatrarenitzala” kontzeptua eta Bert Helingeren teoria sistemikoa aztertuko ditugu ariketen bidez.

Zer da pedagogia sistemikoa? Pedagogia sistemikoa hezkuntza munduan familia konstelazioen teoria eta praktikaren aplikazioa da. Familian eta eskolan Hellingerrek aurkitutako lege sistemikoak errespetatzen ez badira, arazoak eta gatazkak izanen ditugu. Lege hauek onarpenean, errespetuan inklusioan eta esker-ematean oinarritzen dira. Hau da, pertsona batek bere etxean, bere familian, bere lanean ez badu bere bizitza den bezala eta bere ingurukoak diren bezala onartzen, arazoak izango ditu. Beste alde batetik, bere lekuan ez badago, arazoak izango ditu, besteak baztertzen baditu edo baztertuta sentitzen bada, gaizki sentituko da eta ez badu daukana eskertzen, beti kexan eta kritikan biziko da.

Gatazka eta hauen konponbideak landuko duzue modu berezian. Zergatik? harrigarria da nola bi pertsonen artean zerbait gertatzen denean, bakoitzak bere bertsioa kontatzeko orduan, beste pertsonari errua leporatzen dion. Hori horrela bada, nork dauka ardura? Nor da bestea?  Horrek pentsarazten digu denok gure barruan ikusten ez dugun zonalde bat dugula. Hain zuzen ere, leku itzal honetan sartu beharko gara gatazka konpontzeko.

Zein da erabiliko duzun metodologia? Tailer moduan planteatu dut, horrek esan nahi du erabat esperientziala izango dela, ariketa sistemikoen bidez egingo duguna.

Norentzat da ikastaro hau? Norberaren ezagutza pertsonalean aurrera egin nahi duenarentzat. Bere familian eta lantokian dagokion lekua aurkitu nahi duenarentzat eta gatazkaren jatorria, esanahia eta konponbidea landu nahi dutenentzat. Nahi duten pertsona guztientzat, gatazka bizitzaren motorra baita.

Lorea Agirre: “Ezinbestekoa da gizartean ditugun menderakuntza moduak ezagutzea, izena jartzea”

Jakin, Oihaneder Euskararen Etxea eta UEU elkar hartuta datoz “Euskaltzaletasuna eta feminismoa: zer ikasi, hura elikatu” ikastaroa eskaintzeko. Abiapuntua uztailean Usurbilen egindako “Hizkuntza, generoa, jatorria eta klasea gurutzatzen diren lekua” Jakin Jardunaldia da. Elkarguneko feminismotik, lau tasun horien gurutzaketaz eta nolakotasunez jardun zuten hizlariek, eta ildo horiei jarraituz osatuko da hizkuntzari eta generoaren gurutzaketari propio erreparatuko dion ikastaroa. Horretarako, lau hitzaldi eta mahai-ingurua antolatu dira urtarriletik maiatzera bitarte.

Usurbilen udan egindako Jakin Jardunaldiaren jarraipena izango da Gasteizko Oihanederreko ikastaroa? Bai, jarraipena izango da baina ez errepikapena. Alde batetik, Usurbilgo ikastaroan landutako ideia nagusiak jorratuko dira Oihanederren, eta orduko hizlari batzuek ere hartuko dute parte. Baina, gaiaren beste ertz batzuk ere agertuko dira hizlari berrien ahotik. Horregatik, bestalde, auziari alde eta ikuspuntu berriak gehituko dizkio Oihanederreko ikastaroak, eztabaidak aurrera jarraitzen duenaren seinale. Beraz, espirituan Usurbilgo lurrikararen erreplika bat da ikastaroa, gai hau lurrikaratxo bat badelako. Horregatik eskatu zaio Jakini Gasteizen egitea ikastaroa, hain zuzen.

Ikastaro honetan propio euskaltzaletasunaren eta feminismoaren elkarguneaz arituko zarete. Zein ikuspegi eta asmorekin? Ideia giltzarria hauxe da: bai euskal hiztuna eta bai emakumea sistemikoki mendean hartzeko modua eta ideologia berberak direla. Bi menderakuntza horietako bat edo biak gorputz sozial berean gertatzen dira, gainera. Beraz, menderakuntzatik irteteko eta berdintasuna erdiesteko aliantzak egin behar dituzte euskaltzaletasunak eta feminismoak, onuragarri, beharrezko eta koherenteena delako. Horretaz jardungo dugu ikastaroan.

Idurre Eskisabel irakasle eta kazetariarekin batera eskainiko duzu zuk aurreneko hitzaldia, eta otsailean Mari Luz Esteban antropologoaren txanda izango da. Marko orokor hori zehaztuko duzue aurrenik? Bestelako zapalkuntzen inguruan jardungo duzue? Bai, Idurrek eta biok auziaren marko orokorra eta geure posizioa azalduko ditugu. Eta bestelako menderakuntzak ere aipatuko ditugu, dela jatorria, dela klasea eta beste. Horrek guztiak oso konplexu bihurtzen du analisia, baina gertatzen zaiguna ulertzeko derrigorrezkoa dugu begirada hori. Zergatik? Ezinbestekoa delako gizartean ditugun menderakuntza moduak ezagutzea, izena jartzea eta elkarren arteko harremana zein den ikustea, non gurutzatzen diren jabetzea; feminismo beltzak ekarri zuen intersekzionalitateko edo elkarguneko feminismoaren oinarriak dioena jarraiki. Helburua ez baita menderakuntzen hierarkia bat egitea, baizik eta, feminista afroamerikarrek azpimarratu dutenez, elkarren arteko aliantzak jostea. Era berean, garrantzitsua da menderakuntza bakoitzari izena jartzea, eta non, noiz eta nola gertatzen diren ohartzeko tresnak izatea. Izan ere, menderatzailea, hau da, pribilegioduna nor den, noiz den eta nola jarduten duen izendatzea dakar horrek.

Adibide zehatzagoetatik hitz egingo dute Amelia Barquín eta Miren Artetxek? Bai, eremu konkretuagoetatik arituko dira biak. Amelia Barquínek, esaterako, hizkuntzaren erabilera sexista izango du hizpide. Eta Miren Artetxek ahalduntzea euskaratik, generotik eta bertso mundutik aztertuko du, ziurrenera hirurak elkargunean hartuta. Ez nuke nahi, azkenik, mahai-ingurua aipatu gabe utzi. Izan ere, norbere ikuspegitik arituko dira elkarrizketan Aizpea Otaegi, Jaime Altuna eta Ane Labaka azken saioan, hizkuntza hautuaren eta generoaren arteko harremanaz.

Ikastarorako leku guztiak agortu dira, udan ere Jakin Jardunaldian gertatu bezala. Herritarren artean dagoen jakin-minaren seinale? Ze irakurketa egiten duzu? Nire ustea da berebiziko garrantzia duela gaiak. Euskaraz, generoaz, klaseaz (edo prekarietateaz) nahiz jatorriaz intersekzionalki hitz egiten dugunean ohartzen garelako ze herri, gizarte, gizatasun eta elkarbizitza daukagun, eta, ondorioz, nahiko genukeen hori ere ari gara mahai gainean jartzen. Horra bere balioa. Gainera, ahalduntzeari bide ematea da auzi horren xedea, bereziki ahalduntze kolektiboa eta kolektiboen arteko elkar ahalduntzea. Hau da, ez bakarrik bakoitza bere talde eta tasunean (dela euskaldun gisa, dela emakume gisa, dela prekarizatu gisa, dela migrante gisa), baizik eta herritar gisa ahalduntzean datza. Eta horrek esan nahi du demokrazia eta justizia sozialaren parametroetara ekarri behar direla auzi partikulartzat tratatuak diren aipatutako ertz horiek guztiak, plaza publikoaren erdigunean kokatuz. Ikuspegi eta jarduteko modu hori oso tresna baliagarria da, beraz. Horregatik uste dut aparteko garrantzia duela.

Itziar Uriarte: “Gaitasunen garapena lortzeko parte-hartze aktiboa eta motibazioa kontutan hartzen duen ikaste-irakasteko era honek”

UEUren udaberriko eskaintzaren barruanArazo-egoeratik proiektura. Proiektu bidezko metodologiak sustatzen. PBL.” on-line ikastaroa antolatu dugu. Itziar Uriarte Crespo izango da irakaslea eta hainbat galdera egin dizkiogu. Matrikula zabalik dago.

Zein da ikastaroaren helburua? Ikastaro honen helburu gorena irakasleei, modu praktikoan, Proiektuetan Oinarritutako Ikaskuntza sustatzen duen metodologiaren nondik norakoak eskura jartzea eta aldaketa metodologiko hori aurrera emateko beharrezkoa duten azken urratsa egiten laguntzea da.

Zer da ikaskuntza esanguratsua? Errepikapenetik eta edukietatik urrunduta, gaitasunen garapena lortzeko parte-hartze aktiboa eta motibazioa kontutan hartzen duen ikaste-irakasteko era dela esan genezake. Egungo ikasleek estimulu anitzak jasotzen dituzte eta jakin-mina ugari dituzte. Egoera horri etekina ateratzea ezinbestekoa da ikasleentzat esanguratsua den esperientzia sortzeko, baita esanguratsua den eta, ondorioz, iraunkorra izango den ikaskuntza lortzeko.

Eta Proiektuetan Oinarritutako Ikaskuntza? Ikaste-irakasteko modu kooperatiboa da eta ondorengo alderdiak betetzen ditu:

  • Ikaslea ikertzailea edota sortzailea bilakatzen da eta irakaslea gida.
  • Erabiltzen diren materialak anitzak dira.
  • Talde lana ezinbestekoa da. Ikasleak rol aktiboa du.
  • Xedea sorkuntza izanda, ikaste-irakaste prozesu aktibo eta esanguratsua gertatzen da.
  • Gaitasunen garapenarekin batera, edukien barneraketa ematen da.
  • Diziplinartekotasuna, hein batean edo bestean, modu naturalean ematen da.

Zer nolako abantailak ditu metodologia honek? Abantaila nagusiak, nire ikuspuntutik, motibazioa eta ikaskuntza esanguratsua dira. Bi alderdi hauek oso erlazionatuta daude, izan ere, ikasleek erronka bat daukatenean hori lortzeko motibatuago agertzen dira eta motibazio horri zein erronkaren errealitate kutsuari esker, ikasleek egiten ikasten dute eta ikasten dutena modu bai biziago bai iraunkorrago batean barneratzen dute.

Zein da erabiliko duzun metodologia? Aurretik esan dudan bezala, erabiliko den metodologia guztiz praktikoa izango da. Nahiz eta ikastaroa on-line izan, hasierako aurrez aurreko saioan azalduko den bezala, parte-hartzaileek haien proiektuaren diseinua egiten, osatzen eta hobetzen joango dira ikastaroan zehar; ikastaroaren amaieran hori praktikara eramateko. Egiten ikasiko dugula esan genezake.

Norentzat da ikastaro hau? Irakasle ororentzat onuragarria dela esan genezake, baina ondorengoetara mugatu dugu: Haur Hezkuntza, Lehen Hezkuntza eta Derrigorrezko Bigarren Hezkuntzako irakasle zein Berritzeguneko kideak. 

Gotzon Carcar: “Ahalik eta naturaltasun, argitasun eta jario handienarekin komunikatzeko teknika erraz eta baliotsuak irakastea dut helburu”

UEUren udaberriko eskaintzaren barruan “Harreman harmonikoak izateko komunikazio trebetasunak. Zure bizitza aberasteko gakoak”  ikastaroa antolatu dugu Iruñean. Gotzon Carcar Muertza izango da irakaslea eta hainbat galdera egin dizkiogu. Matrikula zabalik dago.

Zein da ikastaroaren helburua? Ahalik eta naturaltasun, argitasun eta jario handienarekin komunikatzeko teknika erraz eta baliotsuak ikastea, besteek hobeki ulertzea ahalbidetuz, lanean denbora eta eraginkortasuna aurreztuz, gatazkak konponduz, autoestimua ere hobetuz eta gainerakoekin ditugun harremanetan kalitate handiagoa lortuz. Horrekin guztiarekin, emaitza hobeak eta bizi kalitate hobea izatea lortu nahi da.

Inoiz baino tresna gehiago ditugu harremanetan egoteko, baina badirudi elkar komunikatzea kosta egiten zaigula. Hau zergatik gertatzen dela uste duzu? Txikitan, bizitzan moldatzeko balio izan digun modu bat, rol bat, komunikatzeko era bat ikasi genuelako (adibidez: lotsatia, liderra, kanporakoi edo barnerakoi, esanekoa, eta abar luze bat). Ikasitako rol hori, nahiz eta ikasitako gauza bat izan besterik ez, identitatea bezala kategorizatu egin genuen. Harremanetan, norberak  bere egoa adierazten du (identitate faltsu hori) eta hori salbu mantendu nahian, talkak, gaizki-ulertuak, zauriak, eta erasoak sortzen ditu.  

Entzutea komunikazioaren zati garrantzitsua da, baina askotan ez diogu arretarik jartzen. Oso bitxia da, hitz egiteko aho bakarra dugu, eta bi belarri entzuteko; hala ere, bikoitza entzun beharrean berba biderkatzen dugu; errespetu falta oso handia da. Berriro norberaren egoaren kontu bat da, arreta gugan dugulako denbora guztian, munduaren zilborra bagina bezala.

Ahotsak ere zeresan handia du, ezta? Bai horixe!! Mezua ondokoaren bidez eta ondokoekin igortzen da:

  • Gorputzarekin: haren mugimendua, gorputzaren jarrera, eskuak, besoak, hankak, keinuak, oreka, aurpegiera.
  • Hitzarekin: edukia
  • Ahotsarekin: bolumena, erritmoa, abiadura, tonua, harmonia, oihartzuna, isiluneak.

Ahotsa gure komunikatzeko gaitasunaren herena da, beraz, oso garrantzitsua.

Edukiari, mezuari ematen diogu garrantzi gehien. Hemen ere zenbait gauza hobetu beharko genituzke... Eta hain zuzen, hori da tailer honetan gehien lantzen dena. Aipatutako hiru ubide horietako bakoitzari dagokion arreta emango diogu.

Zein da erabiliko duzun metodologia? Funtsean, teknika guztiak pertsonaren esperientzietan oinarrituko dira, eta modu praktikoan landuko dugu (eginez ikasi). Parte-hartzaileen artean egindako ariketa anitzek urratsez urrats osatzen dute prozesu guztia. Ariketa guztien aurretik irakasleak demostrazioa egiten du parte-hartzaile batekin edo batzuekin. Ondoren, parte-hartzaile guztiek proposaturiko eta demostraturiko ariketa esperimentatzen dute. Erabilitako teknikak Programazio Neurolinguistikako tekniken corpusekoak dira, eta irakaslearen esperientzia eta trebetasunekin batera aberastu egiten dute trebakuntza-ikaskuntza-irakaskuntza esperientzia.

Norentzat da ikastaro hau? Pertsona-taldeekin eta haien aurrean komunikatu behar duten guztiei zuzenduta dago, esaterako: irakasle eta ikasleei; gaiak, txostenak edo produktuak aurkeztu behar dituztenei; hitzaldiak eman eta lan-taldeak zuzendu behar dituztenei (negozioak, enpresak, salmentak, osasuna, ideiak igortzeko jarduerak, prentsa, irratia, politika, sindikatuak, etab.); aisialdiko, familiako, bikoteko, adiskideen arteko harremanak hobeto nahi dituztenei, etab.

Udaberriko eskaintza Eibarren, Iruñean eta on-line.

2018ko udaberriko eskaintzan izena emateko aukera irekita dago, hona maiatza bitartean emango diren ikastaroak:

On-line

Ikasgelakoak

 

Matrikulazioa

  • Dagoeneko irekita dago eta ikastaroa hasi baino astebete lehenago itxiko da.
  • UEUren web gunetik edo UEUren bulegoetan (Bilbo, Eibar, Iruñea).

 

Eskuratu hemen kartela: 2018 udaberria kartela

Argibideak

Isasi-Markeskoa Jauretxea, Eibar
+ 34 943 82 14 26
markeskoa@ueu.eus

Iruñeko bulegoa
Baratzeetako zeharkalea, 2., Iruñea
+ 34 948 36 25 63
nafarroa@ueu.eus

Juan Ezeiza: “Moodle-ren jarduera motibagarriak sortu eta irakasleen lanerako erabilgarria izango den molde birtuala prestatzea dira ikastaro honen helburuak”

UEUren udaberriko eskaintzaren barruan “Moodle-ren gamifikazioa eta ikasleak motibatzeko sormenezko hainbat erabilera ikastaroa antolatu dugu on-line. Juan Ezeiza Gutierrez izango da irakaslea eta hainbat galdera egin dizkiogu. Matrikula zabalik dago.

Zein dira ikastaroaren helburuak? Ikastaroaren helburuak, besteak beste, Moodle-ren oinarrizko ezaguera duten irakasleek e-learning plataforma horren potentziala ezagutu, jarduera motibagarriak sortu, gehigarri ez-estandar batzuekin aritu eta irakasleen lanerako erabilgarria izango den molde birtuala prestatzea dira.   

Moodle potentzial handiko tresna da, baina ez zaio etekin guztia ateratzen. Zergatik dela uste duzu? Egia da. Irakasle askok Moodle dokumentu-biltegi soil moduan erabiltzen dute. Batzuek galdetegi eta zereginak ere erabiltzen dituzte, baina oso gutxi dira Moodle-ren gehigarrien erabilpen zabala egiten dutenak. Moodle.org webgune ofizialean 150 gehigarri ez-estandar baino gehiago daude eta ez dira gutxi euskaratuta daudenak (jarduera-moduluak, galderak, blokeak, iragazkiak...). Nire ustez, horren zergatia formazio-falta da. Eguneroko lanak denbora gutxi uzten digu eskuliburuak irakurri, foroetan nabigatu edo ikastaroetan matrikulatzeko, baina ahalegina eginez gero, atera daitekeen etekina handia da. Programatzen ez dakien irakasle batek bere ikastaroetan jolasak, gurutzegramak, hitz-zopak, denbora-lerroak, bideo interaktiboak, ebaluazio gurutzatua lantzeko tailerrak, foro ebaluatuak, glosarioak, datu-baseak, berrikusteko karta-jokoak eta abar luze bat gehi dezake.   

Zer da gamifikazioa? Gamifikazioa ingeleseko game (jolas) hitzetik dator. Berez, jokoekin zerikusirik ez duten jardueretan jokoen teknikak erabiltzea esan nahi du. Gamifikazioa, hezkuntzaz gain, beste esparru batzuetan aplikatzen da, hala nola, enpresa-munduan, osasunean edo publizitatean. Hezkuntzan hainbat planteamendu posible dago: adibidez, ikastaro oso bat jolas luze bihur daiteke (pertsonaiak, bete beharreko erronkak, puntuak, dominak, taldeak, lehiaketak...) edo bakarrik jarduera batzuk gamifikatu (une batean gurutzegrama, sudoku edo beste jolas bat erabiliz) edo tarteko bide bat har daiteke (saio bakar bat gamifikatuz, jolasak eta teknika didaktiko klasikoak tartekatuz...).

Askok beldurra diete on-line ikastaroei. Moodle ikasleak motibatzeko tresna egokia da? Zergatik? Moodle tresna malgua, boteretsu eta askotarikoa da. Motibazioa erabileran dago. Irakasle batek arbela eta klarionaz motiba dezake eta beste batek ordenagailu eta proiektoreaz ikasleak aspertu. Moodle ikasketa-ingurune modularra da eta modulu horiek oso motibagarriak izan daitezke erabilera-mota asko ahalbidetzen dutelako. Irakasle batzuek Moodle-ri beldurra diote, hainbeste aukera daukanez, galduko direlakoan daudelako. Ikasleek, aldiz, pentsa dezakete on-line ikastaro batean ordenagailuaren aurrean bakarrik egongo direla, astuna izango dela eta zalantzak argitzea zaila egingo dela. Hiru eragozpenak tutoretza-lan egokiarekin uxatzen dira. Ikastaroan taldeko lanari eta praktikotasunari garrantzi handia emango diegu. Gainera, komunikazio-tresna ugari erabiliko ditugu (foroak, egunkariak, barne-mezularitza...) ikasleek irakaslearekiko eta ikaskideekiko gertutasuna senti dezaten.   

Moodle-ren jarduera atseginak izango dituzu irakasgai. Adibide bat jartzerik izango zenuke? Lehen aipatu ditudan jolasez gain, jadanik dauzkagun materialak era berritara berrerabiltzeko teknikak landuko ditugu. Esate baterako, betiko galdetegietako galderak erabiliz, ikasgelan aurrez aurreko galdetegiak, Arcade motako Marteko inbasoreen jolasak edo aberatsaren jolasa (50×15) antolatzen ikasiko dugu. Beste adibide bat: definizio-bilduma batetik abiatuz, gurutzegramak, hitz-zopak, urkatuak, sugeak eta eskailerak, sudokuak edo karta-jokoak oso azkar prestatzen ikasiko dugu.   

Zein da erabiliko duzun metodologia? Ikastaro guztiz praktikoa izango da. Moodle-ren moduluen erabilera aztertu ahala, parte hartzaileek praktikak egingo dituzte, on-line ikastaro bat osatzeko saiakera eginez. Ikasleen ikas-prozesua autonomoa bultzatu nahi da eta horretarako nork bere kasa ikasten segitu ahal izateko baliabideak eskaini nahi ditugu. Bestalde, foroak ezinbesteko tresna izango dira taldean ezagutza eraikitzeko.    Ikasleek beraiek taldeka diseinatutako ikastaroak eraiki beharko dituzte, ikasitakoa oinarri gisa hartuz eta beren ikasleekin aplikatzeko helburua izanez. Aipatzekoa da lehenengo saioa presentziala izango dela. Lehenengo saio horretan, Moodle-ren gamifikazioaren ereduak erakusteaz gain, ikastaroaren oinarriak eta nondik norako nagusiak azalduko dira. Hortik aurrera, ikastaroa on-line izango da.   

Norentzat da ikastaro hau? Ikastaroa Moodle-ren oinarrizko ezaguera duten etapa guztietako irakasleei zuzenduta dago. Parte-hartzaileek Moodle-ren barruan gutxienez fitxategiak igotzen, ikasleentzat edukiak argitaratzen eta zeregina bezalako modulu sinpleak kudeatzen jakin beharko dute.

 

 

UEUko Sailburuak: Nor da Nor?

UEUko bazkideak 27 sailetan banatzen dira. Sail bakoitzak jakintza-alor batean lan egiten du eta autonomoa da. Sail bakoitzak koordinatzaile bat izaten du (Sailburua), bolondres gisa lan egiten duena. Urtean behin Sailburuen Biltzarrean biltzen dira guztiak.

 

ITZIAR ADURIZ AGIRRE (Errenteria, 1965)

Hizkuntzalaritza saileko Sailburua

Euskal Filologia ikasten ari zela izan zuen lehenengoz UEUren berri, Larraonako Udako Ikastaroen bidez, 1987 urte inguruan. Lizentziaturako ikasketak bukatu ostean, 1992. urtean, irakasle moduan itzuli zen Larraonako UEUko ikastaroetara, IXA taldearekin hasitako elkarlanaren emaitzaren berri ematera. Ordutik aurrera, ia etengabekoa izan da UEUko Hizkuntzalaritza sailarekin izan duen harremana, udako ikastaroetan, Hizkuntza-Teknologia (Hiztek) graduondokoan 2002. urtetik aurrera eta azkenik, 2012tik aurrera, saileko koordinatzaile.

Harremanetan jartzeko

 

INHAR AGIRREZABALA SAENZ DE SANTAMARIA (Zarautz, 1980)

Arkitektura saileko Sailburua

2004. urtean ezagutu zuen UEU, arkitektura eskolan, eta urte horretan bertan Biarritzen udako ikastaroetan parte hartu zuen ikasle gisa. Segidan bazkide egin zen eta orbitan ibili ondoren 2012an eskaini zioten saileko gidaritza hartzeko Anartz Ormazarekin batera. Arkitektura estudio batean egiten du lan eta irakasle gisan jarduten IBN-IEB-UdLk (Institut für Baubiologie + Nachhaltigkeit – Insitituto Español de Baubiologie – Universitat de Lleida) eskainitako bioeraikuntza masterrean.

Harremanetan jartzeko

 

ELISABETE ALBERDI CELAYA (Markina-Xemein. 1975)

Matematika saileko Sailburua

Matematika ikasten ari zela ezagutu zuen UEU, UEU-k argitaratutako zenbait libururen bidez. Ondorengo kontaktua komunikazioarekin lotutako ikastaro batean parte hartu zuenean izan zen. UPV/EHU-ko Matematika Aplikatua Saileko irakaslea da, Bilboko Ingeniaritza eskolan. Matematika saileko arduraduna da 2012tik.

Harremanetan jartzeko

 

OSKAR ARANTZABAL IRAETA  (Eibar, 1967)

Ekonomia saileko Sailburua

Ekonomia eta enpresa zientzietan lizentziatua naiz (Deustuko Unibertsitatea, Euskal Herria) eta Nazioarteko marketinean masterduna (Strathclyde University, Glasgow, Scotland). Esportazio lanetan jardunean nabil, sektore industrialean. EITBn ekonomia gaietan kolaboratzaile eta estatu txikietan espezializatua. Juan Zelaia saria irabazi nuen 2013an, honako saiakeragatik: “Azpilkueta, ekonomiaren aitzindari” Inguma datu-basean zazpi erreferentzia ditut, UEUrekin izandako lehen harremanetik: “Estatu txikien ekonomia handiak” (2008) eta UEUn argitaratu nuen 2012. urtean “Lurraldearen dimentsioa estatuaren eraketan” liburua. 2017an, koordinatzaile gisa aritu naiz “Ikasgai sozioekonomikoak Eskozia eta Kataluniako prozesuetatik” liburuan.

Harremanetarako

 

OIER ATEKA BARRUTIA (Bilbo. 1980)

Osasuna saileko Sailburua

UEU aspalditik “kanpotik” ezagutu arren, Ikergazte-ren lehenengo jardunaldietan parte hartu eta gero, atzerrian urte batzuk eman ondoren, Euskal Herriko osasun, ikerkuntza eta irakaskuntza gaien inguruko ekintza ezberdinetan hasi zen. Egun Osakidetzan lan egiten du barne medikuntzarekin erlatutako behin-behineko postuetan. 2017aren bukaeran hartu berri du UEUko Osasun sailaren koordinaketa lana.

Harremanetan jartzeko

 

HARITZ AZURMENDI ARRUE (Albiztur. 1991)

Filosofia saileko Sailburua

UEU udako ikastaroen bitartez ezagutu zuen ikasle garaian. Orain, Joxe Azurmendiri buruzko tesiarekin dihardu, haren nazioari buruzko ikuspegia ikertuz. AEKn irakasle aritua da eta Galtzaundi Tolosaldeko Euskara Taldeko zuzendaritzan ere badabil. 2017an UEUko Filosofia sailburutza hartu zuen. Donostiako Filosofia Fakultatean egiten du lan.

Harremanetan jartzeko

 

OIER BIKONDOA DEL BARRIO (Eibar. 1973)

Fisika saileko Sailburua

UEU Leioan ikasten nengoenean ezagutu nuen. Euskararen erabilera orohar, eta bereziki zientzian bultzatzea gustatuko litzaidake. Ildo horretan lan egiteko eta Fisikaren inguruko euskal komunitatea biltzeko asmoarekin egin nintzen sailburu. Une honetan non/zertan lan egiten dudan: University of Warwick-entzat ikertzaile moduan egiten dut lan Grenoblen (Frantzia) dagoen ESRFko (European Synchrotron Radiation Facility) “XMaS UK-CRG Beamline” sinkrotroi-erradiazio lerroan.

Harremanetan jartzeko

 

INES CASTIELLA IMAZ (Barañain. 1974)

Itzulpengintza saileko Sailburua

Ingeniari industriala naiz formakuntzaz eta lanbidez, eta energia berriztagarrietan nabil lanean; baina horretaz gain sarritan egiten ditut itzulpen teknikoak beste hizkuntzatatik euskarara, eta bi eleberri txiki ere itzuli ditut. Sinetsita nago euskara batua hizkuntza oso gaztea izaki, bere erabilera formala sustatzeko  eta baita bere existentziaren berri mundura zabaltzeko,  itzulpengintza lana ezinbestekoa dela, ongi merezitako duintasuna jaso ahal izan dezan.  

Harremanetan jartzeko

 

IÑAKI DORRONSORO MAIOZ (Ataun. 1994)

Sexologia saileko Sailburua

Natura Zientzietako sailburuaren bitartez izan zuen UEUren ezagupena, 2017an. Sexologia sailean lan egitea zegoela ikustean, bertako ardura hartu zuen. Ingeniaritza zibileko ikasketak burutu izan arren, hainbat jakintza alorretara zabaldu du interesa, antzerkigintza, sexologia eta historia, esaterako. Hainbat proiekturen artean, EHE, Torto GA eta SMEuskaldundu taldeetan lanean ibilia da.

Harremanetan jartzeko

 

GORKA ETXEBARRIA DUEÑAS (Gasteiz. 1988)

Historia saileko Sailburua

2016ko irailean hartu zuen UEUko historia sailaren ardura. Historia Garaikidean doktoregaia da egun, Euskal Herriko Unibertsitatean. Musikagintzari lotua bizi da (Hudaltzainak, Bertso-Tavern, Montauk…) eta proiektu komunikatibo askeekin engaiatuta. Akademiaren, euskalgintzaren eta kultura herritarraren arteko zubia eraiki eta mantentzea du ardatz bere UEUrekiko atxikimenduan.

Harremanetan jartzeko

 

MIKEL ETXEBERRIA OKARIZ (Beasain. 1994)

Natura Zientziak saileko Sailburua

2013. urtean ezagutu zuen UEU, EuskalNaturaren bidez urte hartan antolatu zuten Natur Zientzien I. Topaketan parte hartu zuenean. Ondoren 2017ko udan UEUren udako ikastaroetan Erlezaintza ikastaroaren antolaketan hartu zuen parte. 2017ko udazkenean Natur Zientzien Sailburu hasi zen UEUn.

Harremanetan jartzeko

 

RAKEL GAMITO GOMEZ (Arrasate. 1984)

Pedagogia saileko Sailburua

UEUko lantaldeko kide bilakatu zen 2016aren hasieran, on-line irakaskuntzaren arduradun bezala. Urtebete luzez on-line ikastaroak eta ikasgela birtuala kudeatu zituen baina 2017ko apirilean UEUko Eibarko bulegoa utzi behar izan zuen bere doktorego-ibilbidean aurrera egiteko. Denbora-tartea laburra izan arren, harremana estua eta oso bizia izan da hasiera-hasieratik. Ordutik, beti saiatzen da UEUk antolatzen dituen ekintza guztietan parte hartzen eta zenbait ikastaroetako irakasle ere izan da.

Harremanetan jartzeko

 

XABIER LANDABIDEA URRESTI (Bilbo, 1981)

Komunikazio saileko Sailburua

UEU Miarritzen ezagutu nuen lehen aldiz, Ikus-entzunezko komunikazioaren bigarren urtean nengoela. Erromantikotasun eta profesionaltasunaren arteko oreka transmititu zidan orduan, eta oreka zail hori gordetzen jakin du gerora ere, IkerGazte kongresuaren Batzorde Dinamizatzailean eta Batzorde Zientifikoan parte hartzerakoan ikusi ahal izan dudan bezala. UEUko Komunikazio Sailburua naiz, eta Talde Eragileko kidea 2017tik. Euskal Herriak bizi duen aro zirraragarri honetan UEU lehen mailako eragile intelektual eta soziala izateaz gain, euskarak behar eta merezi duen statusa lortu dezan lanean dabilen edozeinentzat ezinbesteko aliatua dela uste dut.

Harremanetan jartzeko

 

EDURNE LARRAZA MENDILUZE (Altsasu, 1976)

Informatika saileko Sailburua

1995. urtean ezagutu zuen UEU, UPV/EHUko Informatikako irakasleen bidez. Orduan Informatikan Ingeniaritzako lehen urtea ikasten zebilen. Urte horretan bertan Iruñeko udako ikastaroetara joan han ikasle moduan aritu zen udaro 1998an bere lehen ikastaroa emateko aukera izan zuen arte. Hurrengo urteetan Nafarroako Unibertsitate Publikoan aritu zen informatikako irakasle moduan eta ondoren UPV/EHUko Informatika Fakultateko irakasle izatera pasa zen, gaur egun arte. Tarte horretan jarraitu zuen ikastaroren bat ematen eta 2003an Informatikari Euskaldunen IV. Bilkuraren (IEB) koordinatzaile lanetan aritu zen. Ondoren atseden tartetxo bat hartu eta 2014an bueltatu zen Informatikako sailaren buru bezala. Lan horretan urteroko ikastaroen antolakuntzaz gain, 2015ean ospatu zen X. IEBren eta I. Informatikaren irakaskuntza lehen eta bigarren hezkuntzan mintegiaren koordinatzaile izan da.

Harremanetan jartzeko

 

JOSU LOPEZ GAZPIO (Tolosa, 1987)

Kimika saileko Sailburua

Donostiako Kimika Fakultateko ikasle zela ezagutu zuen UEU eta harrezkero UEUren hainbat ekimenetan gogotsu parte hartu du. 2015ean UEUko unibertsitate-mailako ikasmaterialak sustatzeko laguntzei esker “Kimika orokorreko eskuliburua” argitaratu zuen. 2016ko uztailean “Zientziaren dibulgazioa: aukerak, baliabideak eta erronkak” udako ikastaroa antolatu zuen, Koldo Garcia UEUkidearekin elkarlanean. 2017ko martxotik UEUKo Kimika Sailaren ardura du.

Harremanetan jartzeko

 

YOLANDA MENDIOLA MIRASOLAIN (Aubervilliers, 1963)

Zuzenbide saileko Sailburua

2010. urtean ezagutu nuen UEUn Jendaurrean hitz egiteko eman nuen ikastaro baten ondorioz; Iruñean izan zen lehendabizikoa eta Baionan bigarrena, Urte horretan egin nintzen bazkide eta handik gutxira Zuzenbide saileko sailburu. Batez ere, udako ikastaroei begira aritzen naiz arloarekin zerikusia duten gaien bila eta talde barrutik edo kanpotik datozen ideiak asko estimatzen ditut. UEUko beste sailekin elkarlana egiten dut ere.
Euskal telebistan dut nere lanbidea eta kultura, zuzenbidea eta oro har gizarte gaiak dira ikusmira sortzen didatenak.Elkarkidetzan sinesten dudalako hainbat taldetan boluntario lanetan aritzen naiz.

Harremanetan jartzeko

 

FERNANDO OLABARRIETA ARTETXE (Lezama, 1957)

Psikologia saileko Sailburua

UEU lagun baten bitartez ezagutu nuen eta 1982an Iruñeko Larraona Ikastetxean izan nuen lehen kontaktua. Han egiten ziren ikastaro horietan askotan parte hartu dut, ikasle bezala hasieran eta irakasle bezala gero, betiere Psikologia sailean. Gaur egun, UPV/EHUko Psikologia Fakultateko irakaslea naiz eta, beti aitortzen dudan moduan, UEUn ikusi, ikasi eta bizi dudanak neurri izugarrian balio izan dit nire ibilbide pertsonalean eta profesionalean. Talde eragileko kide izan nintzen aurreko txandan eta orain Maritxu Jimenezekin batera Psikologiako sailburua naiz.

 

ANARTZ ORMAZA UGALDE (Bakio, 1981)

Arkitektura saileko Sailburua

Arkitektoa  eta hezitzailea TEO Arkitekturan, Aranzadi Zientzia Elkarteko bazkide eta Arkeologia Saileko kolaboratzailea eta umeentzako arkitektura tailerretan hezitzailea, besteak beste urte batzuz Bilboko Guggenheim Museoan. Dantzaria eta euskal dantza irakaslea Deustuko Unibertsitatean. 2012ko udan hartu zuen parte lehendabizikoz UEUn, Bioerikuntza eta Geobiologia ikastaroko ikasle moduan. Urte berean bertan hartu zuen Inhar Agirrezabalekin batera Arkitektura Saileko ardura, Kepa Iturralde aurreko Sailburuaren eskutik. UEUko Arkitektura Sailaren bitartez ordurarte arkitekturako ikasketetan lantzen ez ziren gaiak garatzeko aukera ikusi zuten, eta gai hauen inguruan proposatzen dituzte ikastaroak. UEUk argitaratutako “Aldiri arkitektura eta abar” aldizkariko erredakzio kontseiluko kidea da.

Harremanetan jartzeko

 

IDOIA ORUETA SANTA MARTA (Bilbo, 1975)

Musika saileko Sailburua

2015. urtean ezagutu zuen UEU eta 2016ean Musika Sailaren ardura hartu zuen. Musika lizentziatua da biola espezialitatean, bai eta irakaskuntzan diplomatua, luteria ikasketaduna, idazlea eta ikerlaria. Eskola Publikoan irakaslea da lanbidez.

Harremanetan jartzeko

 

NEREA PAGALDAI AGIRIANO (Arrasate, 1993)

Natura Zientziak saileko Sailburua

2014.urtean ezagutu zuen UEU, Euskalnatura elkartearen bidez Natur Zientzien II. Topaketa antolatzerakoan. Pasa den urtean UEUren udako ikastaroen barnean eskeintzen zen Erlezaintza ikastaroaren antolaketan parte hartu zuen eta aurten, 2017an, Natur Zientzien Sailburu bezala hasi da UEUn.

Harremanetan jartzeko

 

IRATXE RETOLAZA GUTIERREZ (Donostia, 1977)

Literatura saileko Sailburua

1996. urtean Euskal Filologiako ikaslea zela ezagutu zuen UEU, eta urte hartan bertan Udako Ikastaroetan ikasle aritu zen lehen aldiz. Harrezkero, ia urtero Udako Ikastaroetan aritu da ikasle. Lehen hitzaldia ere UEUko Udako Ikastaroan eskaini zuen, 2002. urtean, Itzulpengintza Sailak eta Literatura Sailak antolaturiko ikastaroan. 2006. urtetik UEUko bazkidea da, eta 2013. urtetik aurrera Literatura saileko sailburua da Amaia Serranorekin batera.

Harremanetan jartzeko

 

AITOR SALABERRIA OIARTZABAL (Lezo, 1994)

Natura Zientziak saileko Sailburua

UEUrekin lehen harremana 2013ko Iruñeko udako ikastaroetan eduki zuen arren, Euskalnatura ikasle elkartearen bidez ezagutu zuen hobeki erakundea. Biologo ikasketaz, hasiera batean ikastaroak antolatzen laguntzen zebilen, baina 2017an sailburu egin zuten aurrekoei erreleboa emateko. Egun Euskalnatura eta UEUren arteko zubi dabil, euskal unibertsitatea helburu!

Harremanetan jartzeko

 

AMAIA SERRANO MARIEZKURRENA (Donostia. 1984)

Literatura saileko Sailburua

UEUrekiko lehen harremana liburuen bitartez izan zuen. Beranduago, ordea, Iratxe Retolazak aipatu zion Literatura Sailaren ardura hartzeko aukera zegoela eta, bitan pentsatu gabe lanari ekin zioten 2014. urtean. Harrezkero hainbat ikastaro antolatu, koordinatu eta eman dituzte, heziketa literarioarekin eta genero ikerketekin lotuak batik bat; horietan parte hartzeak jende interesgarri mordoa ezagutzeko aukera eman diete. EHUko Irakasle Eskolan egiten du lan. Irakaskuntza eta literatura dira bere bi lan-esparruak.

Harremanetan jartzeko

 

RUBEN URIZAR ENBEITA (Gernika. 1965)

Hizkuntzalaritza saileko Sailburua

1995ean izan zuen lehenengoz UEUren berri, Larraonako Udako Ikastaroen bidez. 2012an hartu zuen Hizkuntza saileko zuzendaritza Itziar Adurizekin batera, hizkuntzalaritza-saila biziberritzeko asmoaz, urte askotako etenaldiaren ondoren. Lehen urte hartan, Hizkuntzalari Euskaldunen I. Topaketa antolatu zuten, eta dagoeneko hirugarren edizioan da.

Harremanetan jartzeko

ARKAITZ ZARRAGA AZURMENDI (Durango. 1972)

Glotodidaktika saileko Sailburua

UEUrekiko harremana orain dela urte asko hasi nuen, edukien zein formaren aldetik ezin erakargarriagoak egiten zitzaizkidan ikastaro batzuen bidez. Glotodidaktika eta Soziolinguistika izan dira betidanik nire gai kuttunak, eta horietan jardunaldi, artikulu zein ikastaroen bidez trebatu ondoren, joan den hamarkadan nire lehen ikastaroa eman nuen hizkuntzaren biziberritzearen inguruan. Harrezkero hainbat formazio saio eman eta jaso ditut. Joan den ikasturtean, Glotodidaktikari bultzada bat emateko eskaria jaso nuen eta, jakina, hainbeste jaso eta gero, ezin ezetzik esan. Jakinda inguruan oso prestatuta dagoen eskarmentu handiko jendea dagoela ikusita, hizkuntzaren irakaskuntzan dauden joeretan sakondu eta geurean ahalik eta modurik eraginkorrenean aplikatzeko saiakera egingo dugu, beti aurrera egiteko asmo garbiaz.

Harremanetan jartzeko

Izaskun Orue Sola: “Bullyinga zenbat eta hobeto ezagutu, orduan eta hobeto identifikatu, eta aurre egin ahal izango diogu”

Azpeitiko Udalak eta UEUk datorren azaroaren 24rako antolatutako Bullyingaren mugak gainditzen jardunaldiaren barruan “Bullyinga: zer da eta zer aldagaiekin erlazionatzen da?” hitzaldia izango da Izaskun Orue Sola Psikologian doktore eta Deustuko Unibertsitateko irakaslearen eskutik.

Bullyinga (edo cyberbullyinga) zer da eta zer ez da? Oraindik zalantzak sortzen dira?
Bullying-a errepikatzen den erasoa da, nahita egiten dena eta biktimari min egiteko asmoa daukana. Gainera, ez da indar orekatua dagoen erlazio batean ematen, biktimak indar gutxiago izaten du. Ez da bi umeen arteko borroka bat edo egun bateko istilu bat. Azken urteotan cyberbullying-a agertu da eta teknologia berrien bidez egiten den bullying tradizionalaren luzapen bezala hartzen da (Patchin & Hinduja, 2006). Bien artean antzekotasun handiak badaude ere (jokaera agresibo errepikakorrak, nahita eginak, min egiteko asmoa dutenak) badaude ezberdintasunak bien artean. Adibidez, cyberbullyingaren bidez erasotzen duen pertsonak bere identitatea askoz errazago ezkutatu dezake eta honek ondorioak ekiditea errazten du. Gainera, cyberbullying-a edozein mementotan gerta daiteke, ez da beharrezkoa erasotzailea eta biktima leku berean egotea. Beraz, biktimak ez dauka leku seguru bat, ezta oporretan ere ez.

Zeintzuk dira ezaugarriak bullying edo jazarpen gisa sailkatzeko?
Denboran zehar errepikatua izan behar da, nahita egina eta biktimak ez dauka aurre egiteko indarrik edo estrategiarik.

Eta ondorioak? Besteak beste, Cyberbullyingak depresioarekin edo droga edo interneten menpekotasunarekin duen harremana aztertu duzu.
Bai, ondorio ugariak erlazionatu dira: depresioa, antsietatea, autoestimu falta, drogen kontsumoa, buruaz beste egiteko ideiak eta jokaerak…

Zer da zehatz-mehatz jardunaldian landuko duzuna?
Jardunaldian bullying-a zer den eta zer ez den aztertuko dugu, nahaste handia baitago. Cyberbullyinga ere ikusiko dugu. Arrisku faktoreak eta ondorioak ere ikusiko ditugu.

Beharrezko zen era honetako jardunaldia?
Holako jardunaldiak beti daude ondo. Halako arazoak zenbat eta hobeto ezagutu orduan eta hobeto identifikatu eta aurre egin ahal izango diegu.

46.Udako Ikastaroak – PROPOSAMENAK bidaltzeko epea ireki dugu

2018an Udako Ikastaroen 46. ikastaldia izango dugu eta hasi gara dagoeneko antolaketarekin.  UEUren sarea zabala da eta horri esker urtero proposamen ugari eta interesgarriak jasotzen ditugu, UEUrekin lan egin nahi duen orori irekita dugun deialdiei esker.

Ikastaro/Jardunaldia proposatu nahi duzula? Hona argibideak.

2018ko Udako Ikastaroen ezaugarriak:

  • Datak: 2018ko ekainaren 25tik uztailaren 13ra. (oharra: bestelako data batzuk behar izanez gero, kasuan kasu aztertuko dira).
  • Tokiak: Eibar, Baiona, Iruñea eta proposatutako jarduerak behar duen tokia (kasuan kasu aztertuko da).
  • Barnetegia: Baionan Bernat Etxepare Lizeoan barnetegia izango dugu, beraz barnetegia behar duten jarduerak kontutan hartuko dira.
  • Formatua: tailerrak, ikastaroak, hitzaldiak, gogoeta guneak, mintegiak, jardunaldiak, topaketak…
  • Iraupena: 10/15 ordukoak, 2/3 egunetan ematekoak.
  • Jarduna: goizez soilik edo goiz eta arratsaldekoa.
  • Behin ikastaroa onartuta, uztailera bidean eman beharreko antolaketako urratsak gidatuak dira.

 

Proposamenak bidaltzeko:

  • Epea: 2017ko azaroaren 21etik 2018ko urtarrilaren 31 (barne) arte.
  • Proposamena bidaltzeko ondoko formularioa osatu behar da: UI46 formularioa
  • Proposamen guztiak aztertuko dira eta otsailaren erdialderako erantzungo da.

 

Ideia bat daukazu baina ez dakizula ikastaro bihurtu daitekeen, irakasle on bat ezagutzen duzu eta bere ikastaro bat gustura egingo zenuke… lasai bidali ideia, guk lagunduko dizugu forma ematen.

Zuen proposamen eta iradokizunak ongi etorriak izango dira, aurrez mila esker!
Edonolako galdera, zalantza edo iradokizunik izanez gero, idatzi edo deitu lasai.

 

Kontaktua:
Irati Iciar, Udako Ikastaroen arduraduna,
943 82 14 26
i.iciar@ueu.eus

.

Urko Fernandez Roman: “Interneteko bizitza, bizitza erreala da, ez birtuala”

Azaroaren 24an “Bullyingaren mugak gainditzen” jardunaldia izango da Azpeitian Udalak eta UEUk antolatuta. Urko Fernandez Roman PantallasAmigas ekimeneko proiektu arduradunak “Hiritartasun digital arduratsua eta aktiboa nola sustatu haur eta nerabeen artean” izango du mintzagai. 

Gailuak gailu, erabileraren arabera izango da arazo edo abantaila
Bai, azkenean mugikor adimentsu batek, eta orokorrean Internetera sarbidea ematen duen edozein pantailak, aukera asko eskaintzen ditu, horien artean erabilera apropos ugari daudelarik. Internet eta teknologia berri askoren abantailak ezagunak dira, baina arrisku gutxi batzuk ezagutu egiten badira ere, horiek saihesteko neurriak edo gertatutakoan ondorioak nola murriztu litezkeen ez dira jorratzen.

Ez hori bakarrik, teknologia berriek ere jendartean ezezagunak diren beste hainbat onura eta aukera eskaintzen dituzte, baina normalean berehalako onurak ematen dizkiguten aplikazioak besterik ez ditugu erabiltzen. Testuinguru digitalean ziber-alperkeri asko dago, eta jendartea “azukre” digitala bakarrik kontsumitzera ohitu da, eta dieta horrek abantaila baino arazo gehiago ekartzen ditu.

Grooming, sexting, cyberbullying… Pribatutasunaren eta nortasun digitalaren kudeaketa ere hor dago.
Pribatutasuna eskubide bat ez ezik, babes faktore bat ere bada. Interneten ez dugu ez gure, ez besteen pribatutasuna behar den bezala zaintzen eta errespetatzen, sari gehiegi jasotzen baititugu gehiegi pentsatu gabe jokatzen dugunean (“like”, retweet eta sare sozialek dituzten beste hainbat mekanismoei esker).

Interneten gaudenean, milioika pertsonek osatzen duten erkidego batean ari garela kontuan izan behar dugu. Lurralde, kultur, adin, izaera, pentsamendu, eta abar ezberdinak dituen jendearekin harremanetan jartzen gara bertan. Lagunekin, familiarekin edo edozein beste talde batean gaudenean bezala, parte hartzea oso interesgarria da eta besteekiko dugun portaera, kalean bezala, egokia izan beharko litzateke.

Gure irudia, gure itxura, ere gure datu pribatu bat da. Legez, ezin da pertsona baten datu pribaturik erabili bere baimenarekin ez bada. Pertsona bati argazkia egin nahi badiogu, baimena eskatu beharko diogu; baita edozeini bidali edo edonon eskegi nahi badugu ere. Aldi berean, argazki bat atera nahi badigute edo gure irudia nonbait eskegita ikusten badugu eta bertan egotea nahi ez badugu, argazkia atera duenari edo argazkia eskegi duenari, ezabatu dezala eskatu beharko genioke. Eta, era berean, norbaitek bere irudia edo bere edozein datu pertsonal ezabatzeko eskatzen digunean, guk jarri badugu, ezabatu beharko genuke eta barkamena eskatu.

Interneten guztiak izan gara noizbait heldu-berriak. Erabiltzen hasi ginenean ez genuen testuinguru digitala menderatzen. Kalean bezala, jende tartean gabiltzanez, Interneten badaude jendetasunez eta errespetuz ibiltzeko bete beharko genituzkeen arauak. Ez dira legeak, baina Interneten elkarbizitza egokiago bat izateko, liskarretan ez sartzeko, eta pribatutasunarekin zerikusia duten arazoak ez izateko oso baliagarriak dira. Ez badugu ez bizikidetasuna, ez besteon eta gure pribatutasuna zaintzen, jazarpen digital mota ezberdinen biktima izan gintezke, edo nahi gabe gu izan jazarpen horiek gauzatzen ditugunak!

Nahikoa prestatuta al gaude irakasle/gurasook haur zein nerabeak gai horretan hezteko? Zein izan behar luke batzuen eta besteen papera?
Irakasleek badute Interneten arriskuak ezagutzeko aukera, horretarako formakuntza desberdinak jasotzen baitituzte. Formakuntza horietan ere jarrera arriskutsuak antzemateko eta saihesteko gomendioak bereganatzen dituzte. Nahiz eta oraindik sakontasun eta espezializazio gehiago behar izan, oinarri bat behintzat bereganatua daukate. Irakasleek pribatutasunaren garrantzia azpimarratzen ikasi behar dute haur hezkuntza eta lehen hezkuntzan batez ere, era berean bizitza digitalerako trebetasunak irakatsiz: enpatia, pentsamendu kritikoa, asertibitatea, erabakiak hartzea, emozioen eta sentimenduen kudeaketa. tentsioen eta estresaren kudeaketa…

Gurasoak berriz arrail digital honetan oraindik nahiko galduta dabiltza, eta egun bizi den egoeraren eta beraien ezagutzaren artean distantzia gehiegi dago. Gurasoek Interneten ere hezten ikasi behar dute; beren seme-alabei aholkuak eta beharrezko jarraipen, kontrol eta akonpainamendua emateko gauza asko dituzte oraindik ikusteko eta ikasteko. Esperientzia hau bereganatzeko Interneten ere bizitzen ikasi behar dute, eta testuingurua ondo ezagutu eta ulertu ondoren, irakatsi eta transmititu nahi dituzten balore eta bizitza ikasgaiak era eraginkor batean egiteko gai izango lirateke.

Zer hartu beharko genuke kontuan hiritartasun digital arduratsua eta aktiboa sustatzeko?
Hiritarrak garenean ez gara besteak baino gehiago ezta gutxiago, berdinak gara gure desberdintasunekin. Ekintza justu eta tratu onekoen protagonistak izaten ikasi behar dugu, ez bakarrik kanpoko edo offline munduan, baita Interneten ere. Interneteko bizitza, bizitza erreala da, ez birtuala.

Hiritar bezala eskubide batzuk baditugu, baina baita betebeharrak ere. Besteentzako garrantzitsuak gara, edo izan beharko ginateke, eta besteen egoera eta ekintzak garrantzitsuak izan beharko lirateke guretzat. Sentimendu eta inplikazio hori izateko, gizarte digital honetan parte hartu behar dugu, gure iritziak partekatuz eta proposamenak eginez, besteen ekimenen zain geratu gabe. Haur eta nerabeengan kontzientzia digital hau garatzen badugu, etorkizun positibo baten aurrean geundeke.