Euskal Unibertsitatea Europan

Unibertsitatearen gertatzen ari diren aldaketak aurrera jo ahala ikasle eta irakasleen egonezina handitzen eta handitzen doa. Ikasleek bere adierazpen batean Bolognako prozesua etetea eta moratoria eskatzen dute. Alabaina, kreditu-sistema berria abian dago. Titulu berrien diseinurako oinarriak jarrita daude eta ikasketa palan berriak aurki abiatuko dira. Ustekabekorik gertatzen ez bada 2009/2010 edo 2010/2011 ikasturterako gradu eta gradu ondoko titulu berriak indarrean egongo dira.

Une honetan Espainiako unibertsitate publikoetan, UPV/EHU barne, graduko titulu berrien justifikazioa eta ikasketa-planak diseinatzen ari dira. Bien bitartean, kreditu europarrak bere bidea egiten du. Datorren ikasturtean, 2008/2009 ikasturtean, lehenbiziz matrikulatzen diren ikasleek fakultate eta eskola askotan kreditu europarra ezagutuko dute baina oraingo ikasketa-planekin. Tituluak oraindino ez dira aldatuko, beraz.

Aldaketa prozesua mantso dator. Aurrenik eta behin, unibertsitateko ikastetxe bakoitzean proposatu behar da graduko tituluen ikasketa-plana eta gradu ondoko tituluak. Gero unibertsitate bakoitzak proposatutako tituluak Espainiako Unibertsitateen Kontseiluko galbahetik igaro behar dute. Berme eta ikuskatze prozesu horietatik igaro eta gero, azkenik, Espainiako Unibertsitate, Zentro eta Tituluen Erregistroan (RUCT) onartzen dira tituluak. Prozesu hori guztia egin arte ez dago tituluak era ofizialean indarrean jartzerik.

Oraindik orain, aurreneko urratsak egiten ari dira. Unibertsitateko ikastetxe batzuetan besteetan baino bizkorrago baina, Hego Euskal Herrian, oraindino ez dago titulu berririk. Aldatzen ari dena, hori bai, kreditu-sistema da. Apurka-apurka unibertsitateko ikastetxe gehienetara zabaltzen ari da kreditu europarra. Kreditu-sistema honekin Europa Batasuneko estatu gehieneko ikasketa unibertsitarioak harmonizatu nahi dira. Hau da, erraztu nahi da ikasleen mugikortasuna Europako unibertsitateen artean ikasleek kurtso desberdinak unibertsitate desberdinetan egin ahal ditzaten.