ILLENE

Aurtengo aratoste edo inauteriek denboraldi bati agur esan eta hurrengoa esku zabalik hartzeko muga markatu dute. Zezeilaren lehenengo asteetara arte buruak kea dariola egon gara batzuk, ia-ia gautxori bihurtu gara hiruzpalau astetan eta hain urduri egon gara batzuetan non ingurukoek azterketa garaia amaitzeko guk baino gogo handiagoa izan duten.

Egunok igarota, eguneroko erritmo normalera itzultzea ez da batere zaila izan. Burua geuretzeaz gain, gorputzak ere eskertu du lo orduak jarraian izatea. Eta garai berri bati hasiera ezin hobea emateko juerga on batekin hastea baino hoberik ez dago. Horrela, aratosteak ospatzeko asteburua nahiko izango ez zelakoan, ekainera arte ikusiko ez dugun lagun bati agur bikoitza egiteko aitzakia bikaina topatu zuten batzuek.

Era horretara, azterketak amaitu nituen egunean bertan neure bizitzak beste norabide bat hartu zuela iruditzen zitzaidan. Alde batetik, libre sentitzen nintzen eta aurreko asteetako presioa alde batera uzteko aukerarik onena lagunekin zapatuko agurra prestatzea izan zen. Bestetik, ikaragarri poztu ninduen eta aurrera jarraitzeko indarra ematen didan lan-eskaintza baterako elkarrizketa izan nuen. Baldintza eta pertsona onak ikusita, baietz esatea ez zen zaila izan.

Eta, sehileko berriaren ondo etorria hobetzeko asmoz, geuk ere zertaz mozorrotu ginen oso ondo ez genekien mozoarrekin lotsabako legez irten ginen kalera. Itzelezko parranda egin genuen eta hotza, euria, haizea... ez ziren oztopo izan. Erritmo honek luzaro iraungo ahal du!