JeanJo Ferrand irakaslea da. Denbora luzez Iparraldeko lizeoetan frantsezez irakatsi izan du ekonomia. Duela urte bete, Kanaldude tokiko telebistak proposamen bat egin zion: ekonomiaren oinarrizko kontzeptuak euskaraz aurkeztu, kronika gisa, modu bisual, pedagogiko eta batez ere dibertigarrian.
Esan eta egin, lizeoko ekonomia irakasleak Kanalduderen bitartez hainbat saio prestatu ditu: Iparraldeko gazte euskaldunei ekonomia modu desberdin eta berritzaile batez irakasteko metodologia finkatu du!
Beharbada kronika horiek ez dira bereziki baliagarriak izango ekonomia “adituentzat” (horrelakorik balego…), noski. Horrek ez du inporta, egia esan: Kanaldudeko lagunen asmoa bestelakoa da… institutu edo lizeoetako irakasleentzat interesgarria izan daitezkeen baliabide pedagogiko dibertigarriak ekoiztea!
Iparraldean ekonomia derrigorrezko irakasgaia da bigarren hezkuntzan. Hegoaldean, ostera, hautazko irakasgaia. Horregatik, Iparraldean jaiotako ekimen hori Hegoaldean are garrantzitsuagoa izan daiteke. Euskal Herri osoan beharrezkoa dugu gazte jendeari ezezik, edozein herritarrei zuzendutako prestakuntza-ekimen berritzaileak sortzea eta zabaltzea. Zabalkunde hori modu artistikoan egiten bada, hobe! Eta ekimen horiek ekonomiaren gaia euskaraz jorratzen badute, bikain! Alor ekonomikoan oinarri sendoak behar ditugu, beti ere, ikuspegi kritikoa, soziala eta lokala bermatuz: horren harira, ikus ere Kanaldudek Iparraldeko ekonomiari buruz dituen bestelako bideoak.
“Bolondres lana izaki, jendearen sustengua da gure soldata bakarra!”. Eman diezaiogun Kanaldudekoen lanari behar duen sostengua. UEUko Ekonomia Saileko talaia honetatik ekonomia “ikas’t’eko” bideoak zabaltzeko deia egiten dizuegu.
Irati Azkue says:
Ideia bikaina ekonomia guztion eskuragarri egitea. Izan ere, guztiok behar genuke, albistegietan nahiz hedabideetan maiz hitz egiten diren termino eta edukiak ulertzeko gai. Beraz, zoriontzea besterik ez zait geratzen ekimen honengatik Kanaldude-eko adiskideak.
Edozein kasutan, Euskal Herriko ekonomiaz eta gizarteaz beste pixkat ikasteko aldera, EUSKAL EGITURA (http://www.hamaika.tv/tb/saio/19238) saioa dugu, Gaindegia eta Hamaika telebistak elkarlanean ekoitzia. Bertan, 25 minutan, batetik, askotariko gaien azterketa egiten da datuetan oinarrituz Euskal Herriko lurralde guztietarako eta bestetik, ekonomia eta gizarte alorreko ekimen bat aurkezten da, esaterako, Euskal Moneta, Lurzaindia, Goiener, Sutearo…
Ia horrelako ekimen gehiago abian ipintzen diren guztion jakingarri.
UEUko Ekonomia Saila says:
Ikus Jean Joel Ferrand-i egindako elkarrizketa: “(…) jakin behar da badirela ikuspegi desberdinak (ekonomian). Baina anitzetan, orain, teoria nagusia —teoria liberala argi izateko— ekonomiaren izenean mintzatzen da (…)”. Gehiago: http://www.iparraldekohitza.info/2013/12/06/ekonomiaren-izenean-mintzo-da-teoria-liberala/.
UEUko Ekonomia Saila says:
Joseba Felix Tobar-Arbuluk bere blogean sartutako azken post-ak ere baliagarriak dira DTM delakoaren dibulgazio lanetarako (DTM = Diru Teoria Modernoa) : ikus https://www.unibertsitatea.net/blogak/heterodoxia/2013/12/15/haur-ekonomia/ eta https://www.unibertsitatea.net/blogak/heterodoxia/2013/12/16/gazte-ekonomia/.