Informazio sistemen garapenaren atzerriratzea eta unibertsitatea

Informazio sistemen garapena gero eta usuago egiten da Ekialdean, India edo Txina bezalako herrietan. Hango informatikariak trebeak dira, eta askoz merkeagoak. Ohikoa da ondo definitutako lan puska handiak hara bidaltzea. Ondorioz, gero eta programatzaile gutxiago behar dira Europan eta Amerikako Estatu Batuetan. Kontuan izan, gainera, Gartner Group-ek munduan 2010ean sistemen garatzaileen beharra %30 murriztuko dela uste duela.

Amerikako Estatu Batuetako unibertsitateetan informatikako ikasleak %60-70 gutxitu dira. Gazte amerikarrek ez dute uste informatikan lanik topatuko dutenik. Informatikako graduatu berriak ez daude informatikako lan baten bila ere, bestelako lan baten bila baizik. Hala eta guztiz ere, bertako Lan Estatistiken Bulegoak sortzen diren baino informatikari gehiago beharko direla uste du. Zer gertatzen ari da?

Nonbait, komunikabideek gehiegitu egin dute arazoa. Mendebaldean oraindik informatika lan asko egingo da. Eta profesional gutxiegi dagoenik, atzerritik ekarri behar dutela uste du, besteak beste, Espainiako Adeccok. Hirschheim-en eta beste batzuen ustez, programatzetik modelatzera pasako gara neurri handi batean. Lan konplexuenak eta bezerorengandik gertutasuna behar dutenak mantendu eta haziko dira. Hala nola, negozio modelatzea. Epe ertainean hardwarearen diseinua ere mantenduko da. Eta sareen kudeaketa edo mantenimendua bertan egin beharko da orain eta epe luzera. Baina programazioa edo laguntza zentroak murrizten ari dira dagoeneko.

Nola eragingo die atzerriratze joera honek Mendebaldeko informatika ikasketei?
W. Kingen ustez, software interfazetan, kontratuen kudeaketan eta teknologia aholkularitza estrategikoan sakondu behar da. Beste batzuek ikasketetan kanporatzearen eta atzerriratzearen kudeaketa sartu behar direla uste dute. Zehazki, atzerriratze-azpiegituraren kudeaketa, atzerriko sistemen garapenaren kudeaketa, atzerriko eragiketaren kudeaketa eta atzerriko kanporatzearen kudeaketa.

Gehiago jakiteko, irakurri Offshoring and its Implications for the Information Systems Discipline / R. Hirscheim; C. Loebbecke; M. Newman; J. Valor, eta, kontrapuntuan, Espainiako Adeccok eskatzen duena.

Iñaki Agirre Pérez

Nola kudeatu munduko hezkuntza sarerik handiena

Ostiralean, Navarpartyn, Rodrigo Salvador de la Conchak Andalucían egiten duten lan txukuna azaldu zigun. 40 bat informatikariek 2000 bat ikastetxeri zerbitzua ematen diete, Andalucía osoan sakabanatuta. 180.000 bat ordenagailu, eta guztietan Linux banaketaren bat daukate ezarrita. Guadalinex edo Debian hautatu dituzte. Neurrira egindako web aplikazio batez sare osoa kudeatzen dute. Urrutitik ordenagailuak piztu eta itzali, taldeak egin, ikasgela birtualak sortu, eduki-iragazkinak ezarri edo kendu, … Eragiketa asko burutzeko gai da aplikazioa.

Ikastetxe bakoitzean koordinatzaile bana dago, pedagogia profilekoa, eta lagun hauek ere kudeatzaile ordezkariak dira, beraien esparruetan.

Horrenbeste ordenadoreekin erosketak, bertsioak eta adabakiak amesgaizto bihurtu daitezke, baina Centro de Gestión Avanzadon kontrolpean dutela ematen du. Campus edo ikastetxe batzutan informazio eta komunikazio teknologiak kudeatu behar dituztenei beraien gida interesgarri suerta dakieke.

Iñaki Agirre Pérez