Dokumentuaren akzioak
Euskal Herriko oroimen historikoa berreskuratzea helburu duten bi auzolandegi antolatu dituzte udarako
Euskal Herriko oroimen historikoa berreskuratzea helburu duten bi auzolandegi antolatu dituzte Aranzadi Zientzia Elkarteak, UEUk, Udalbiltzak, UPV/EHUk, Adunako Udalak, Asteasuko Udalak, Zizurkilgo Udalak, Galipentzuko Udalak eta Gipuzkoako Foru Aldundiak.
Esan bezala bi dira udarako antolatutako barnetegiak:
- Gerra Zibila 1936-1937. Erresistentziaren oroimena eta aztarnen bila. Uztailak 7-20 bitartean egingo da Adunan, Asteasun eta Zizurkilen (Gipuzkoa).
- Nafarroako mugak Erdi Aroan. Uztailaren 21etik abuztuaren 3ra egingo da Galipentzun (Nafarroa).
Auzolandegien helburua da gazteak auzolanaren dinamikara hurbiltzea eta Euskal Herriko oroimen historikoa berreskuratzea, eta bereziki 18-30 urte arteko gazteei zuzendutakoak dira.
Irakasle lanetan arituko dira besteak beste Francisco Etxeberria UPV/EHUko irakasle eta antropologoa, Lourdes Herrasti Osteoarkeologian aditua, Juantxo Agirre-Mauleon arkeologoa, Juanjo Arrizabalaga arkitektoa eta Aitor Pescador historialaria.
Euskara hutsean antolatutako auzolandegiak dira eta bertan izena emateko epea irekita egongo da ekainaren 27ra arte. Informazio guztia UEUren webgunean duzue.